Á hora de enviar un paquete o límite de responsabilidade pode ser fixo ou negociable. O cliente ten a posibilidade de contratar un seguro adicional cuxo prezo se estipula en función do valor declarado da mercadoría transportada. Este seguro pode cubrir parcial ou totalmente o valor declarado.
Existen algunhas mercadorías especiais que toda empresa pode negarse a transportar. Desde DHL, un dos líderes do sector, citan expresamente os animais, restos humanos, armas ensambladas, diñeiro en efectivo e obxectos ou sustancias prohibidas pola lei.
Outra das principais empresas de paquetería, Seur, lembra que os profesionais informan os clientes das restricións que poden ter determinados produtos e o tipo de transporte máis adecuado para cada un.
Obxectos como antigüidades, xoias, pedras preciosas ou obras de arte teñen restricións segundo o seu valor. O envío de determinados produtos pode estar prohibido en determinados países, por exemplo, o alcol nalgúns estados árabes.
Cando se contrata un servizo de paquetería, convén consultar se a empresa aplica a recarga por combustible. Trátase dunha tarifa variable, segundo o prezo do petróleo, que se suma á tarifa do envío, especialmente aos realizados por vía aérea.
