Gazpatxoak osagaietako C bitaminaren edukia galtzen du osagai guztien nahasketa prestatzen denean. Madrilgo Unibertsitate Konplutentseak eta La Lagunako Unibertsitateak elkarrekin egindako azterlan baten arabera, prozesu horretan C bitamina eta beste azido organiko batzuk desagertu egiten dira. Horregatik, kontsumitu aurretik prestatzea gomendatzen dute.
Analisien arabera, C bitaminaren osagai diren azido askorbikoa eta azido deshidroaskorbikoa hasierako barazkietan dauden substantzia horien baturarekin lortuko genukeena baino txikiagoak dira. “Horrek esan nahi du gaitasun antioxidatzailea galtzen duela”, azaldu du Elena M. Rodríguezek, ikerketaren egilekideak.
Osagaien artean, piperra izan zen C bitamina gehien izan zuena, eta ondoren tomatea. Azido organikoei dagokienez, baratxuriak eta tomateak izan zituzten kontzentrazio handienak, eta pepinoak, berriz, apalenak.
Gazpatxoa ohiko elikagaia da udako hilabeteetan Espainiako mahaietan, eta, gainera, elikadura-dohainen multzo bat da. Frogatuta dago A, C eta E bitaminen, karbohidratoen, gatz mineralen, landare-zuntzaren eta antioxidatzaileen iturri naturala dela. Osaera hori dela eta, oso elikagai egokia da udako beroak freskatzeko, izaera isotonikoagatik, eta, hori guztia, kaloria gutxirekin.
