Nekazaritzako elikagaien arloko lehengai ekologikoen ekoizpena %520 hazi zen Espainian 2000. eta 2009. urteen artean; hasierako balioa, berriz, 2000. urtean kalkulatutako 100 milioi eurotik 2009an 650 milioi eurora igaro zen, %75 landare-jatorrikoa eta %25 animalia-jatorrikoa. Datuak Ingurumen, Landagune eta Itsas Inguruetako Ministerioak (MARM) ekoizpen ekologikoari buruz egindako azterlan batean jaso dira. Isabel Bombal Industria eta Elikagaien Merkatuetako zuzendari nagusiak eman zuen ezagutzera 2010eko BioKordoba Azokaren 14. edizioan.
Nekazaritzako azalera erabilgarri ekologikoa Espainiako azalera guztiaren %5,26 da, eta ekoizle ekologikoak Espainiako nekazaritzako ustiategi guztien %2,42 dira. Sektore horretako industria-egiturari dagokionez, 2009an ekoizpen ekologikoan aritzen ziren 3.038 enpresa zeuden erregistratuta, 685 milioi euro inguru fakturatu eta 18.000 langile inguru aritu ziren lanean. Barazki- eta fruta-sektoreak, olioak, ardoak, haragikiak, okin-opilak eta landare-kontserbak industria-egituraren %61,4 ziren, eta fakturazioaren %74,5 egin zuten.
Gainera, Bombal-ek nabarmendu zuen Espainiako industria ekologikoak Erkidegoko industria-egituraren %7,5 duela, esportatzeko joera handia duela (industria-fakturazioaren %50 hirugarren herrialdeei saltzen zaie), eta nazioartekotze-maila handia duela (industrien %32 esportatzaileak dira).
Txostenean azaldutako datuen arabera, Espainiako elikagai eta edari ekologikoen itxurazko merkatuaren balorazioa 905 milioi euro ingurukoa da, hau da, elikagaien gastu osoaren %0,97, biztanleko eta urteko 19,4 euroko per capita gastuarekin, eta landare-produkzioa handiagoa da.
Produktu ekologikoen esportazioak 454 milioi eurora iritsi dira; horietatik 356 milioi produktu manipulatu edo eraldatuak izango lirateke, eta 98 milioi lehengai. Bestalde, inportazioak 190 milioi euro ingurukoak dira, gehienak eraldatutako edo manipulatutako produktuak. Sektoreka, frutak eta barazkiak, olioa eta ardoa esportazioen %74 dira, eta horietatik %85 Alemania, Frantzia, Erresuma Batua, Italia, Suitza, Herbehereak eta Belgikarako dira.
Ikerketa 2009an hasi zen, eta 2010ean garatu zen, Espainiako nekazaritzako elikagaien industria ekologikoen jarduera aztertu eta baloratzean oinarrituta. Bonbalek nabarmendu zuenez, “horrek sektorearen balio-kate osoaren ikuspegi integrala izatea eskatu du, ekoizpena eta merkatua barne”.
