Hiru osagairekin egiteko 6 errezeta

• Egilea: Egilea Peio Gartzia
• arabera: Astelehena, 2013ko azaroaren 11

Irudia: missy&the universe

Oinarrizko hiru osagairekin sukaldean egitea

Batzuetan —adibidez, erosketak egiteko denborarik izan ez dugunean edo plangintzak huts egin duenean—, gure sukaldeak arazo gehiago ekar diezazkiguke konponbide baino. Hala ere, oinarrizko hiru osagai daude (irina, arrautzak eta olioa), potentzial handia dutenak, eta, kontserbaren baten laguntzarekin, tortilla frantsesa edo ohiko larrialdiko arrautza frijitua baino zerbait landuagoa egiteko aukera emango digutenak. Errezeta hauek horren adibide dira.

1. 
   Etxeko ogia arrautzarekin. Hau egiteko, legamia pixka bat erabiltzeko lizentzia hartuko dugu, edozein motatakoa; adibidez, bizkotxo bat egin genuen azken aldian sobratu zitzaiguna, galdutako zorrotxo batean edo despentsako txoko batean kajatxo batean beti geratzen den hori. Osagai hauek beharko ditugu: 250 g irin, 5 g legamia, gatz apur bat, arrautza bat eta 100 ml ur epel. Arrautza erabili nahi ez badugu, 50 ml ur gehiago gehituko ditugu, errezeta honetan azaltzen den bezala. Egiteko erraza eta oso goxoa den arren, kontuan izan behar da pazientzia behar dela, orea labean sartu baino pare bat ordu lehenago harrotzen utzi behar baita, eta labeko denbora 40-50 minutu ingurukoa baita.

2. 

   Enpanada-orea. Oso lagungarria da enpanada eta enpanadilletarako orea etxean izatea, batez ere kontserbaren batekin bete badezakegu: atuna, muskuiluak, sardina txikiak tomatetan… Nahikoa da izpitzea eta nahastea; arrautza egosi txikitua gehitu diezaiokegu, trinkotasun eta zapore handiagoak emateko. Nahikoa kontserba badugu, enpanadarako orea egin dezakegu, eta soberan ditugun ertzekin enpanadilla txiki batzuk egin, berdin-berdin bete eta izoztu, beste noizbait jateko. Orea egiteko, hau behar dugu: 200 g irin, 100 ml ur epel, 10 ml oliba-olio, 2 g gatz eta legamia pixka bat (baldin badaukagu; bestela, berdin egin dezakegu, baina ez da hain harroa geratuko). Ore horrek ogitarakoaren aldean duen abantaila da denbora gutxiago utzi behar dela harrotzen (erdia). Ikusgarriagoa izango da gainazala arrautza irabiatuarekin pintatzen badugu.

3. 

   Etxeko pasta freskoa. Pasta italiarra gustatzen bazaigu, bada oinarrizko errezeta bat espagetiak eta ravioliak egiteko, baita lasagna egiteko ere (zerekin bete baldin badaukagu). Kilo bat indar-irin (gozogintzarako ez dena), zazpi edo zortzi arrautza (tamainaren arabera) eta gatz pixka bat besterik ez dugu behar. Beste osagai batzuk izanez gero, hala nola espinakak, tomateak edo erremolatxa, errezetaren osaera alda dezakegu, eta arrautzen ordez horiek erabil ditzakegu, koloretako pastak lortzeko.

4. 

   Txurroak. 400 g irin, 500 ml ur, gatz apur bat eta arrautza bat nahikoak dira askari goxoa egiteko, errezeta ezin tradizionalago batekin: txurroak. Kasu honetan, arrautza erabiltzen dugunez, zapore finagoa eta testura kurruskariagoa lortuko ditugu. Horretarako, nahikoa da errezeta tipikoaren urratsei jarraitzea, nahastean arrautzak gehitzeaz ahaztu gabe. Halaber, gogoratu behar dugu txurroak frijitzea haien elaborazioaren funtsezko zati bat dela, artikulu honetan azaltzen den bezala, beste trikimailu eta aholku batzuekin batera.

5. 

   Profiterolak. Txurro-masaren oso antzekoa da profiterolena. Alde nagusia da frijitu beharrean labean egiten direla, eta, gero, esnegainarekin edo pastel-kremaren batekin betetzen direla. Prestatzeko, 100 ml ur, 50 ml olio, 80 g irin, 2 arrautza eta gatz pitin bat beharko ditugu. Profiterolak tontortxo- edo makila-formarekin egin daitezke (azken horiei “tximista” deitzen diote toki batzuetan). Egosten den bitartean ez da komeni labea irekitzea, masa hoztu eta ez baita igotzen. Pasta eginda dagoenean, hozten utzi eta erditik ireki. Pasteletarako mahuka baten bidez, erdi bakoitza etxean dugunarekin beteko dugu: esne-gain harrotua, kakao-krema, izozkia…

6. 

   Erroskilak. Aukeratu ditugun oinarrizko hiru osagaiak gozogintzako errezeta ugaritan ageri dira: bizkotxo eta magdalenetatik hasi eta gailetetaraino. Osagai gutxien behar duen errezetetako bat erroskilena da. Erroskilen zaporea anis-ukituarekin edo laranja-azal birrinduarekin nabarmendu dezakegu, halakorik badugu. Ohiko erroskilak prestatzeko, arrautza bat, 250 g irin, 25 ml ekilore-olio, 25 ml ur eta 30 g azukre behar ditugu (seguru etxean baditugula). Txurroekin bezala, olio dezente eta ontzi zabal bat beharko ditugu frijitzeko (hobe lapiko edo ontzi sakon txiki bat, zartagina baino).

Hala ere, tortilla frantsesa egitea erabakitzen badugu, hainbat aukera goxo-goxo daude. Gauza bera esan daiteke arrautzaz, sukaldean aukera ugari eskaintzen baitizkigu.