Haurrentzako barazki-purea: bost urrats lehenbiziko errezetetarako

Sei hilabete betetzean, barazki-purea da haurraren lehen elikagaietako bat.

Bizitzako bigarren seihilekoan, lehen aldaketa esanguratsuak gertatzen dira haurraren dietan. Sei hilabetetik aurrera (zertxobait lehenago, amagandiko edoskitze hutsarekin elikatzen ez bada), trantsizio-aldia hasten da; etapa horretan, Espainiako Pediatria Elkartearen (AEP) Nutrizio Protokoloetan deskribatzen den bezala, elikadura osagarria hasten da, hau da, amaren esnea edo formula ez diren elikagaiak sartzen dira.

Barazkiak (frutaren eta zerealen ondoren) dira bularreko haurraren dietan pure-forman sartzen diren lehen elikagaietako bat, sei hilabetetik aurrera. Baina, nola egin ahia, haurtxoarentzat elikagarria eta gozoa izan dadin?

Aukeratu barazkiak haurraren lehen errezetetarako

Azenarioa eta porrua haurraren lehen barazkien artean daude

Azenarioa, kalabazina, porrua, lekak, kalabaza eta patata dira, oro har, adituek txikienen pureetan sartzea gomendatzen duten lehenengo barazkiak. AEPk, “Elikadura pediatrikoaren eskuliburu praktikoan”, elikagai berriak pixkanaka sartzea gomendatzen du, “kontrako erreakzioen agerpena baloratzeko eta umea zaporeak eta testurak aldatzen ohitzeko”.

Hala ere, badira zenbait barazki, baina, badaezpada, hobe da haurtxoari pureetan ez eskaintzea urtebete bete arte:

• Espinakak eta zerbak. Elikagaien Segurtasunaren eta Nutrizioaren Espainiako Agentziak gomendatzen du barazki horiek 12 hilabete bete arte ez sartzea. Izan ere, nitrato-kopuru handia kaltegarria izan daiteke haurrarentzat. Elikagaien Segurtasunerako Agentziak zehazten du, gainera, urtea baino lehen purean sartuz gero, kopuruak ez duela ahiaren eduki osoaren %20 gainditu behar.

• Aza, azalorea, brokolia, zainzuriak eta erremolatxa. Barazki hauek zapore biziagoa dute eta, gainera, flatulentoak dira. Horregatik, haurtxoen dietan beranduago sartzea gomendatzen da.

Bost urrats haurraren barazki-ahia prestatzeko

• 1. Aukeratu purean sartuko diren barazkiak. Hobe da barazki freskoak aukeratzea, hozkailuan denbora askorik ez dutenak, nutrizio-propietateak gal ez ditzaten.

• 2. Ondo garbitu ur hotzetan, lur hondarrak, intsektuak edo bestelako hondakin kimikoak (pestizidak, esaterako) kentzeko. Kendu azala, beharrezkoa bada, eta kendu hondatuta egon daitezkeen zatiak.

• 3. Barazkiak lurrunetan presta daitezke edo egosi. Jakiak zenbat eta gutxiago iraun, orduan eta mantenugai gehiago kontserbatzen ditu. Egosiz gero, ur gutxirekin egin behar da, eta barazkiak sartu ura irakiten dagoenean. Eltze azkarra ere erabil daiteke denbora gutxian prestatzeko eta propietateak ez galtzeko.

• 4. Bereizi barazkiak egosteko uretatik eta pasatu irabiagailutik. Pixkanaka, sobran dagoen salda gehitzen da, pureari nahi den trinkotasuna eman arte. Lehenengo hilabeteetan, komeni da ahia testura finagoarekin uztea, eta, hartara, errazago bereganatzen du haurrak.

• 5. Gehitu koilarakada bat oliba-olio. Espainiako Pediatria Elkarteak barazkiak birrindu ondoren oliba-olio gordin koilarakada bat gehitzea gomendatzen du, purearen testura hobetzeko.

Haurtxoaren barazki-purearen osagai osagarriak

Barazki-pureari gehitzen zaizkio, pixkanaka, osagai berriak haurraren dietan. Ondoren, osagai osagarriak deskribatzen dira, baita haurraren dietan sartzeko egutegia ere.

• Oilasko, txahal edo arkume haragia. Sei hilabetetik aurrera, haragia haurraren ahian sar daiteke. AEPk gomendatzen du lehenbizi oilaskoa eta, ondoren, arkumea eta txekorra sartzea.

  Lehenik eta behin, kantitate txikiak gehitu behar zaizkio pureari (20-30 gramo egunean). Haragia ez da barazkiekin batera prestatu behar, egosketa-puntu desberdina baitute. Egokiena barazkiak prest daudenean botatzea da, eta batera birrintzea, purea sortzeko.

• Arrain zuria. Haurrak 10 edo 11 hilabete betetzen dituenean, AEPk gomendatzen du arrain zuriaren lehen errazioak (30-40 gramo) haurraren dietan sartzea. Haragia bezala, bakoitza bere aldetik prestatzea komeni da eta gero barazkietan sartzea.

  Oso garrantzitsua da arraina ondo garbitzea, ahian arantzarik gera ez dadin.

  Haurtxoaren purea prestatzeko zazpi aholku ezinbesteko

  1. Ez bota gatzik barazki-pureari.

  2. Egiaztatu elikagaiak manipulatuko diren gainazala eta erabiliko diren tresnak garbi daudela, kutsadura-iturririk izan ez dezaten.

  3. Egokiena purea egunero prestatzen saiatzea da. Ezinezkoa bada eta gehiago egin behar bada, garrantzitsua da hozkailuan gehienez ere 48 orduz edukitzea edo, bestela, banan-banan atera daitezkeen anoa txikitan izoztea.

  4. Egiaztatu beti purearen tenperatura haurrari eman aurretik, erredurak saihesteko.

  5. Koilara biguna (silikonazkoa) eta tamaina egokikoa erabili haurrari lehen ahiak ematen hasteko.

  6. Pediatraren aholkuei kasu egin behar zaie, haurraren nutrizio-egoeraren arabera eskaini behar zaion ahi-kopuruari dagokionez.