Maskorrak: hodien bidez energia aurreztea

Etxean beroari eustea funtsezkoa da energia aurrezteko. Erradiadore bat pizten denean, bero guztia etxebizitzaren barruan egotea espero da. Horregatik, berokuntzako hodietan fluido beroak dabiltzanean, babes berezi bat jar daiteke, hain zuzen ere bero-ihesak saihesteko.

Babesle horiek, maskor deritzenak, instalazioan zehar jartzen diren zilindro hutsak dira. Hodiak forratzen dituzte, disipazioagatiko bero-galerei traba egiteko moduan, eta, aldi berean, tenperatura altuetatik isolatzen dituzte. Hodiak “ezkutuan” daudenean, tarima edo sabai faltsua beroaren eraginez hondatzea eragozten dute; hodiak agerian badaude (errodapiaren gainean), berriz, hodi bero bat ukitzean gerta daitezkeen erreduretatik babesten dute.

Lodiera

Eraikinetako Instalazio Termikoen Erregelamendu berriak (RITE) maskorren lodiera ezartzen du, hodien diametroaren eta haietatik igarotzen den fluidoaren tenperaturaren arabera. Hala, barneko hodietan, hauek dira gutxieneko lodierak:

• 25 milimetro, diametroa 35 mm baino txikiagoa denean eta 100 °C-raino iristen direnean.
• 30 milimetro, diametroa 35 mm-tik beherakoa bada eta 100 eta 180 °C artekoa bada, 35 eta 90 mm artekoa bada eta 100 °C-ra iristen bada, edo 90 eta 140 mm artekoa bada eta fluidoa 60 °C-raino berotzen bada.
• 35 milimetro, diametroa 140 mm-tik gorakoa denean eta fluidoa 60 °C-ra iristen denean.
• 40 milimetro, 90 mm-tik gorako hodietarako, 60 eta 100 °C bitartean, edo 35 eta 90 mm bitarteko hodietarako, 100 eta 180 °C bitartean.
• 50 milimetro, 90 mm-tik gorako eta 100 °C-tik 180 °C-ra bitarteko diametroetan.

Hodiak eraikinen kanpoaldetik doazenean, beroa galtzeko arriskua handitu egiten da; beraz, maskorrak 60 mmlodierakoak izan daitezke. Bestalde, geruza anitzeko hodiek ez dute maskorrik izaten, tenperatura altuak jasaten baitituzte polietilenoz, aluminioz eta polietileno erretikulatuzko barne-hodi bati esker.