Gaurtik aurrera, erabiltzaileek 905 aurrezenbakia duten zenbakietarako sarbidea deskonektatzeko eska diezaiekete telefonia-konpainiei. FACUA kontsumitzaileen erakundeak jakinarazi du linea horietara egindako dei faltsuen fakturazioa salatzen duten 1.500 erabiltzaile-kasu baino gehiago jaso dituela.
Elkarte horrek gogorarazi du zenbaki horietara egindako deien prezioak duela gutxi igo ondoren, bigarren neurria dela Telekomunikazioetako Estatu Idazkaritzaren (Setsi) 2008ko abenduaren 4ko ebazpenak ezartzen duena; horren bidez, 905 telefono-kodea tarifa gehigarriko zerbitzuei esleitu zaie.
Ebazpen horren arabera, erabiltzaileek deskonektatzeko eskubidea erabil dezakete Estatuko Aldizkari Ofizialean (BOE) abenduaren 12an argitaratu eta hilabete igaro ondoren. “Arau horrekin, Setsiak telefono-lineei eta linea horien ardura duten enpresei tarifa-igoera handia oparitu die”, salatu du FACUAk.
Abenduaren 13tik aurrera, 905 aurrezenbakia duten telefonoetara deitzeko finkatutako gehienezko prezioak, eta ondoren, 4koak (telebistako lehiaketetakoak), Telefónicak eta Onok aurrez aplikatutakoak baino %9,1 garestiagoak dira.
“Bi konpainiek tarifa-igoera handia aplikatu zuten 2008an, 0,95 eurotik 1,10 eurora (gehi BEZa) igaro baitziren, eta orain, Estatu Idazkaritzaren erabakiarekin, 1,20 eurokoak dira (beti gehi BEZa). 2008an metatutako igoera %26,3koa izan da”, azaldu du FACUAk.
