Jokoa: zenbat diru mugitzen duen Espainian

Joko pribatua eta tradizionala gainbehera doa Espainian. Zifrek erakusten dute kasinoen, bingoen eta jolas-makinen jarduerak interesa galtzen duela urteen poderioz. Espainiarrek gero eta diru gutxiago uzten dute mota horretako jokoetan. Izan ere, apustu-etxeak eta on line jokoen mota guztiak sartzeko lehia handia dago. 2006an, joko pribatuaren sektoreak (50.000 lagunek baino gehiagok egiten dute lan) 28.881 milioi euro mugitu zituen guztira; 2005ean, berriz, 27.287 milioi euro. Horrela, segmentua %5,85 baino ez da hazi, eta horrek kontraste handia egiten du bi digituko hazkundearekin, 70eko hamarkadaren amaieran eta 80ko hamarkadan. Gainera, joko guztiek atzerakada izan dute biztanleko jokatutako kantitateetan. Guztira, 2006an espainiar batek urtean batez beste 382 euro gastatu zituen joko pribatuan; 2005ean, berriz, 385 euro jokatu zituen biztanleko. Loteria Nazionalaren eta ONCEren egoera oso bestelakoa da, urtetik urtera gero eta jarraitzaile gehiago baitituzte. Joko tradizionaleko enpresa pribatuek neurriak hartzeko eskatu dute, sektorearen diru-sarreren beherakada geldiarazteko, garrantzi handia baitu Espainiako ekonomian.