Atzo Ogasuneko estatu-idazkariak, Estanislao Rodríguez-Ponek eta Miguel Ángel Sánchez Tributuen zuzendari nagusiak komunikabideei aurkeztu zieten Tributuen Lege Orokorraren aurreproiektuan beste zehapen bat jaso zen, “Zerga Administrazioaren jarduketei aurre egin, oztopatu, aitzakiak jarri edo uko egiteagatik”.
Zehapen orokorra 150 eurokoa izanen da. Hala ere, emandako epean Administrazioak egindako errekerimenduei kasurik ez egitea baldin bada eragozpena, 150 euroko isuna jarriko da errekerimendua lehen aldiz betetzen ez denean; 350 eurokoa bigarren aldiz bete ez denean, eta 600 eurokoa hirugarren aldia denean.
Zehapen hori bereziki gogorra da eragozpena agiriak, liburuak, fitxategiak, fakturak, programa informatikoak eta abar ez aurkeztea denean. Zergei buruzko datuak ematera behartuta dauden pertsonek ez betetzea, zehapena 300 eurokoa da lehen errekerimenduan eta 1.500 eurokoa bigarrenean.
Hirugarren errekerimenduaren kasuan, isuna enpresaren fakturazioaren %3koa izango da, gutxienez ere 10.000 eurokoa, eta, oro har, fakturazioaren %5ekoa, gutxienez 15.000 eurokoa, baldin eta oztopoa arauak ezartzen dituen informazioko betebehar orokorrei buruzkoa bada eta bankuei nahiz enpresa atxikitzaileei eragiten badie.
Araua bereziki zorrotza da enpresekin, kontratistek edo azpikontratistek betetzen ez dituzten zerga-betebeharren erantzule subsidiarioak direla uste baitu. Arauak, ordea, ihes-balbula bat aurreikusten du. Kontratistek eta azpikontratistek Ogasunaren ziurtagiri bat aurkezten badiote enpresari, zerga betebeharrak eguneratuak dituela adierazten duena, enpresak ez du erantzukizunik izanen.
Beste berrikuntzetako bat lege-abusua arautzea da. Horren bidez, Ogasunak zigortzeko aukera izango du zergadunek arau jakin batzuk erabiltzen dituztenean, ez helburu ekonomikoekin, baizik eta Fiskalari gutxiago ordaintzeko helburuarekin.
