Ezgaitasuna duten Pertsonen Ordezkarien Espainiako Batzordeak (CERMI), estatu mailako behatoki baten bidez, ezgaitasuna Espainiako unibertsitate-sisteman zenbateraino sartu den neurtuko du. Behatoki horren bidez, prozesuaren bilakaera eta aurrerapenak egiaztatu ahal izango dira, eta sortzen duen informazioa baliagarria izango da “unibertsitateko politika eta estrategia integratzaileak bultzatu, definitu, indartu eta gauzatzeko”, adierazi du erakundeak.
Behatoki horren helburuetako bat “Unibertsitate Inklusioa” txostena egitea izango da. Bi urtean behin egingo da, eta Espainiako unibertsitate-sistemak ezgaitasunaren errealitatean duen barneratze-maila adieraziko du, aldez aurretik zehaztutako adierazle batzuen bidez. Lehen txostena 2012an egongo da eskuragarri, eta hurrengoa, 2014. urtean.
Dokumentua Espainiako unibertsitate-sistematik lortutako informazioaren antolamendu, tabulazio, sistematizazio eta interpretazio zientifikoaren emaitza izango da, bere dimentsio integratzaileari dagokionez, CERMIk azaltzen duenez, aldez aurretik ezarritako adierazle zabal eta fidagarri batzuk neurtuta.
Behatokiaren produktuak eta zerbitzuak egiteko, honako hauen laguntza jasoko da: Espainiako unibertsitateak, hezkuntza-administrazioak (estatukoak eta autonomikoak), gizarte-administrazioak (estatukoak eta autonomikoak), Espainiako Unibertsitateetako Errektoreen Konferentzia (Ikasleen Gaietarako Unibertsitate Sarearen bidez), ezgaitasuna duten pertsonen erakundeak eta horien familiak eta adituak.
