Universia Fundazioak eta Ezgaitasuna duten Pertsonen Ordezkarien Espainiako Batzordeak (CERMI) lankidetza-hitzarmen bat sinatu dute “Ezgaitasuna Espainiako Unibertsitate Sisteman Sartzeko Barometroa” sortzeko. Horren bidez, ezgaitasuna duten ikasleak Espainiako unibertsitateetan sartzeko prozesua neurtu nahi da, eta arlo horretako eboluzio-egoera baloratu, Universia Fundazioak jakinarazi duenez.
Pricewaterhouse Coopers (PwC) izango da ezgaitasuna unibertsitatean zenbateraino sartu den aztertzeko ardura hartuko duen entitatea. Barometroaren alderdi teknikoen artean, azterlanaren aurreko txostenetan zenbait adierazle proposatzen dira, Espainiako unibertsitate-sistemak ezgaitasunaren errealitatean duen barneratze-maila aztertzeko. Aldagai horiek honako hauek aztertuko dituzte: ezgaitasuna duten ikasleei laguntzeko zerbitzua, beketarako eta matrikulaziorako politikak eta prozedurak, irisgarritasunaren ebaluazioa, barne-plantillaren eta irakasleen prestakuntza eta sentsibilizazioa, bai eta ikasteko politikak eta planak, gobernantza eta ezgaitasuna duten ikasleen aukera-berdintasunerako eskubidea arautzen duen berariazko araudia ere.
Azterlan honen azken txostena 2012ko ekainaren 30ean amaitzea aurreikusten da. Alderdi inklusiboari dagokionez aurkezten diren emaitzek “unibertsitateetatik jasotzen den informazioaren azterketaren ondorio izan behar dute. Balioak Universia Fundazioak zehaztu zuen “Inklusio-barometroaren” bidez aldez aurretik ezarritako adierazleen serie zabal eta fidagarri baten neurketatik lortuko dira. Barometroaren helburua da unibertsitateen inklusio-maila ezagutzea, “ezgaitasunak dituzten pertsonentzako aukera-berdintasunean goi-mailako hezkuntza bultzatzen duten ekintzak bultzatzeko”, gaineratu zuen.
