Oilasko gordinaren haragiak mikroorganismo patogenoak izan ditzake, eta horiek 4 ºC eta 60 ºC bitarteko tenperaturetan biderka daitezke. Baina higienearen aldetik egokia den manipulazio batek eta egoste eta hozte egokiak arrisku hori saihesten dute. Erresuma Batuan, Britainia Handiko Elikagaien Agentziak (FSA) kontsumitzaileei dei egin die oilasko gordina janaria prestatu aurretik ikuzi ez dezaten. Britainiarren %44k egiten du hori. Campylobacterrek sortzen duen kutsadura-arriskua murriztea da helburua. Izan ere, herrialde horretan elikagaiak intoxikatzeko modu ohikoenetakotzat jotzen da. Artikuluak aholku batzuk ematen ditu oilaskoan Campylobacter murrizteko eta bakterioa prebenitzeko beste neurri batzuk.
Janaria prestatu aurretik oilaskoa garbitzean, Campylobacter eskuetara, lan-eremuetara edo arropara pasa daiteke, ur-tanten zipriztinen bidez. Bakterioa, batez ere, eskortako hegaztien haragian dago, eta, Britainia Handiko Elikagaien Agentziaren arabera, Erresuma Batuko 280.000 pertsonari eragiten die urtean. Intoxikazio guztietatik, bostetik lau hegazti kutsatuetatik datoz. FSAren gomendioa Elikagaien Segurtasunaren Astea 2014ren barruan dago. Aste hori ekainaren 16tik 22ra izan da, eta aurten “Oilasko gordina ez garbitzea” izan du ardatz. Helburua da kontsumitzaileari beharrezko tresnak ematea oilasko gordinaren haragia gaizki manipulatzeak ekar ditzakeen arriskuak saihesteko.
Oilaskoarekin ‘Campylobacter’ murrizteko aholkuak
Oilasko gordina garbitzeak ‘Campylobacter’en ugaritzea errazten du
Kasu gehienetan, oilasko-haragia egoki manipulatzen da (eskuak garbitu edo bakterioa suntsitzeko moduko egosketa-tenperatura altuetan jarri), baina britainiarren %38k dio hegazti gordinak garbitzen dituela, FSA berak 2012an egindako inkesta baten arabera. Adituek diotenez, praktika horrek Campylobacter bakterioa ugaltzen laguntzen du, eta, beraz, ez litzateke egin behar. Horregatik da garrantzitsua herrialdeko osasun-agintarientzat kanpaina bat egitea, horrek dakarren arriskuaz jabetzeko.
Oilaskoa garbitzen duten britainiarren %36k dio “zikinkeria kentzeko” garbitzen duela; %36k, “germenak kentzeko”; eta %33k, “beti egin duelako”. Praktika txar hori bukatzeaz gain, Erresuma Batuko adituek beste neurri batzuk gomendatzen dituzte:
1. Estali ondo oilasko gordina ontzi batean eta gorde hozkailuan, behealdean, zukuak tantaka eta beste elikagai batzuetara joan ez daitezen.
2. Ez garbitu oilasko gordina. Egosteak bakterio patogenoen zati handi bat hiltzen du, Campylobacter barne; garbitzeak, berriz, bakterio horiek zabaltzen lagun dezake.3. Garbitu tresnak, ebakitzeko taulak, pasteurizatu gabeko esnea. Baserrian neurri egokiak hartzea erabakigarria da hura kontrolatzeko. Hegazti askok ez dute gaixotasuna garatzen eta ez dute sintomarik agertzen. Haragia gaizki egosita jateagatik edo animalia infektatuekin kontaktu zuzena izateagatik kutsatzen da.
FSAk egindako inkestaren emaitzen arabera, kontsumitzaileak Campylobacterri buruz duen ezagutza Salmonella edo E. coli bezalako bakterioena baino txikiagoa da; eta, gainera, bakterioaz gutxi dakiten pertsonetatik, %31k baino ez du erlaziorik eskortako hegaztiekin.
Campylobacter, Salmonellaren ondoan, EBn maizenik aurkitzen diren bakterioetako bat da. 2008az geroztik egiaztatu diren kasuak nabarmen jaitsi diren arren, gehien atzemandako bakterioetako bat izaten jarraitzen du, Elikagaien Segurtasunerako Europako Agintaritzak (EFSA) eta Gaixotasunak Prebenitzeko eta Kontrolatzeko Europako Zentroak (ECDC) urtero egiten dituzten txostenen arabera. Bakterio honi lotutako kasu gehienetan, kutsatutako oilasko-haragia kontsumitzen da.
