Berotze globala handitu egiten da bioerregaien laboreek igortzen dituzten gasengatik, eta horrek berotegi-efektua deritzon horretan eragiten du azkenean, Paul Crutzen Kimikako Nobel Sariak “Chemistry World” aldizkari britainiarrean adierazi zuenez.
Bioerregaien laboreek sortutako gasen emisioa handituz, oxido nitrosoaren (N2O) kantitatearen ia bikoitza sortzen da. Gas horrek berotegi-efektua areagotzen du, Kimikako Nobel saria 1995. urtean irabazi zuenaren eta bere ikertzaile-taldearen arabera. Ideia horrek erregai fosilik ez erabiltzeak sortzen duen edozein onura ukatzea ekarriko luke.
Keith Smith Edinburgoko Unibertsitateko zientzialari eta ikerlanaren egilekideak adierazi zuenez, “ondorio horren garrantzia bioerregaiak erabiliz sor zitezkeen onurak zalantzan jartzean datza”. “Argitu nahi duguna da bioerregaien erabilera areagotuz ez dela inolako onurarik sortzen, eta, hain zuzen, klima okertzea bultzatzen dela”, esan zuen ikertzaileak.
Bioerregaietarako erabiltzen diren ongarriek hasieran aurreikusitakoa baino askoz nitrogeno gehiago sortzen dute (%3tik %5era); alegia, International Panel on Climate Change-k (IPPC) substantzia horiek klima-aldaketan duten eragina kalkulatzeko onartzen duen kantitatearen bikoitza, lan zientifiko horretatik ondoriozta daitekeenez.
