Klima-aldaketa, hondakinen kudeaketa, ur-eskasia edo hirietako garapen jasangarria dira Baliabideen Iraunkortasunerako Institutuaren (ISR) eguneroko lanak betetzen dituen gaietako batzuk, azken ekimenek frogatzen duten moduan. Adibidez, “@02 proiektua”k bi ministerio, hainbat autonomia-erkidego, udal eta enpresa garrantzitsu sartu ditu klima-aldaketaren aurkako 23 neurri abian jartzeko, horietako batzuk berriak. Carlos Martínez Orgado zuzendari nagusiak (Madril, 1957), hondakinen arloan curriculum zabala duen industria-ingeniariak, uste du herritarrek zeresan eta egiteko asko dutela ingurumena mehatxatzen duten kontu handietan.
Baliabideen Iraunkortasunerako Institutua (ISR) fundazio pribatua da, eta hainbat erakunde publiko eta pribatuk, gizarte-eragileek eta munduko adituek osatzen dute. Gure ingurunearekin lotutako arazoetan jartzen du arreta, eta garapen iraunkorraren eta eskura dauden baliabideen aprobetxamenduaren alde egiten du. Arduradunen arabera, ISRren izaera plurala eta independentea dela eta, administrazioen, enpresen, ingurune zientifikoaren eta gizartearen arteko solaskide baliozko bihurtu da urteen poderioz, baita ingurumen-irtenbideen hornitzaile eraginkorra ere.
