Duela 42 eta 36 milioi urte ekuatoreko latitudeetan bizi izan ziren bi pinguino-espezie berriren hondakinak aurkitu dituzte Perun zientzialari argentinar, estatubatuar eta perutarrek. Horrek erakusten du pinguino horiek sortu baino hamar milioi urte lehenago konkistatu zituztela eremu horiek.
Julia Clarke Ipar Carolinako Unibertsitateko biologoak esan zuenez, “pinguinoak hotzari egokitutako espezieak direla pentsatzen dugu, baita gaur egun eskualde ekuatorialetan bizi diren txikienak ere, baina fosil berri horiek azken 65 milioi urteetako garai beroenetakoak dira”.
Ikerketa horren arabera, bi espezie berrietako lehena, “Perudyptes devriesi”, duela 42 milioi urte bizi izan zen, eta indibiduoak 0,75 eta 0,90 metro bitartekoak ziren. Bigarrena, “Icadyptes salasi”, duela 36 milioi urte inguru bizi izan zen eta 1,5 metro inguru egiten zituen. Orain arte hegazti horien eboluzioari buruz indarrean egon den teoriaren arabera, latitude altuetan eboluzionatu zuten —Antartika eta Zeelanda Berria—, eta ekuatorialak ez ziren iritsi duela 10 milioi urte arte, mundu mailako hozte handiaren ondorengo 24 milioi urtera arte. Peruko hegoaldeko kostetan aurkitutako fosilek, ordea, erakusten dute Eozenoan bertan eta planeta osoko tenperatura oso altuekin pinguino-espezie batzuek ekuatorea konkistatu zutela.
