Espainian 2010. urtean eguzki-zentral termoelektrikoak energia-hornidurako iturri gisa soilik erabiltzeak lurraldearen 4.293 kilometro koadroko okupazioa ekarriko luke, %0,85. Hala adierazten dute Eguzki Industriaren Espainiako Elkartearen (Protermosolar) datuek. Elkarte horrek dio gaur egun 21 zentral operatiboek Espainiako 620.000 etxe hornitzen dituztela. Bere web orrian argitaratu duten maparen arabera, egungo estazioek herrialdearen azaleraren %0,006 hartzen dute.
2014. urtean, Industria Ministerioak baimendutako 61 eguzki-energia termikoko zentralak martxan egotea aurreikusten da. Oraindik martxan ez dauden 40etatik, 27 eraikuntza-fasean daude eta 13 oraindik ez dira hasi. Protermosolarren kalkuluen arabera, energia-iturri horrek Espainiako 1.824.562 etxebizitza horni ditzake, Espainiako lurraldearen %0,02 okupatuta.
Bestalde, martxan dauden 21 zentral termosolarrek atmosferara 1.181.908 tona karbono dioxido igortzea saihesten dute. Protermosolarren ustez, Industriak planifikatutako 61 estazioak martxan daudenean 3,4 milioi tona CO2 isurtzea saihestuko da.
Herrialdearen energia-mendekotasuna murrizten laguntzen duen energia garbia izateaz gain, Protermosolarrek dio energia-mota hori dela enplegu gehien sortzen duena. Kalkuluen arabera, 50 megawatteko zentral bat eraikitzen hasten denetik inauguratu arte, 2.500 lagun ingururi ematen die lana urtean.
