Zientzialariek orain dela gutxi arte aztertu dituzten izotz-lagin zaharrenak 390.000 urtekoak ziren. Hala ere, “Science” aldizkarian argitaratutako bi artikuluren arabera, erregistro horrek 200.000 urte gehiago izatea lor daiteke. Lan horietan aipatzen diren laginak 3.270 metroko sakoneran atera ziren, eta horrek atmosferaren konposizioa azken 650.000 urteetan neurtzeko aukera emango du.
EPICA proiektuko zientzialariek, 1996az geroztik metodo hori Antartikan aplikatzen dutenek, jakin dute karbono dioxidoaren maila atmosferikoa azken 650.000 urteetan izandako maila altuenak baino %27 handiagoa dela. Aurkikuntza horrek agerian uzten du gas horren eta beste batzuen kontzentrazioa gizakiaren eraginez uste baino azkarrago handitu dela.
200.000 urteko aldi gehigarriak, praktikan bi glaziar-aro osoren baliokideak, aukera emango die zientzialariei mota horretako gasen ezberdintasun “naturalak” neurtzeko Lurraren historiako garai hotz eta beroetan. Horri esker, gizakiak ingurumenean duen eragina hobeto ulertuko da.
