Espezieek uste baino azkarrago erantzun diote klima-aldaketari. Hala erakusten du Yorkeko Unibertsitateak egindako ikerketa batek. Ikerketa horren arabera, animaliek eta landareek uste baino hiru aldiz azkarrago egiten dute aurrera planetako eskualde hotzagoetara.
Emaitzen arabera, espezieak kokapen altuagoetara eraman dira, 12,2 metroko abiaduran, hamar urteko aldi bakoitzeko, nahiz eta espezie jakin batzuek hamarkada bakoitzeko 17,6 kilometro egin dituzten. Chris Thomas proiektuaren zuzendariaren arabera, batez besteko lekualdatze horrek esan nahi du animaliak eta landareak Ekuatoreko lerrotik 20 zentimetro urruntzen direla orduko urteko egun bakoitzeko. “Fenomeno hori azken 40 urteetan gertatu da eta, gutxienez, mende osoan jarraituko du”, azaldu du Thomasek.
“Science” aldizkarian argitaratu da azterlan hori, eta, lehen aldiz, erakusten du nola areagotu den espezieen lekualdatzea berotzearen ondorioak biziago jasan dituzten eskualdeetan. Gainera, ikerketak azaltzen du migrazio-mugimenduak oso aldakorrak direla espezie bakoitzaren arabera, klima-aldaketekiko sentikortasun desberdina dutelako. Nahiz eta batzuek uste baino abiadura txikiagoan egin duten aurrera edo beste batzuek kokalekua aldatu ez duten, espezie batzuk asko eta azkar mugitu dira. Horren adibide da Coma tximeleta. 220 kilometro mugitu dira Ingalaterrako erdigunetik Edinburgora bi hamarkadatan.
Ondorio horietara iristeko, ikertzaileek 2.000 animalia- eta landare-espezie baino gehiago aztertu zituzten, espezieen kokapen-aldaketei buruz orain arte egindako ikerketa guztien datuak bildu zituen azterlan batean. Kontuan hartu zituzten mundu osoko izaki bizidunen latitude- eta altitude-aldaketak, baina, batez ere, Europa eta Ipar Ameriketakoak, datu gehien zituzten eskualdeak zirelako.
Azterketa horrek ez ditu aipatzen klima-aldaketak etorkizunean espezieek bizirauteko ekarriko dituen arriskuak, baina aurreko ikerketen arabera, ingurumen-aldaketek eragin handia izango dute. Alde horretatik, kalkulu batzuen arabera, munduko espezieen %10, gutxienez, desagertzeko arriskuan daude berotze globalaren eraginez.
