A gripeak 2009. urtean Espainian izan zuen kostu osoa 1.430 milioi eurokoa da, Bartzelonako Hospital del Mar Ikerketa Institutuko Osasun Zerbitzuetako Ikerketa taldearen kalkuluen arabera.
“PLoS ONE” aldizkarian argitaratu da txostena, eta Epidemiologia eta Osasun Publikoko Ciberrek (Ciberesp) parte hartu du. Txostenak gaixotasunari lotutako kostuak ditu ardatz. Hala, 940 euro ordaindu zituen pandemiak milioi eta erdi gaixo anbulatorio bakoitzeko; 3.025 ospitaleratze bakoitzeko, berriz, 6.236 euro.
Guztira, kasu anbulatorioak izan ziren kostuaren zatirik handiena (1.410 milioi euro); kasu larrienetan, berriz, 18,8 milioi euro ordaindu ziren. Hori dela eta, ikerketak berresten du ospitalez kanpoko baliabideek izan zutela eragin handiena ekonomian. Langileen laneko ezintasunak 30,5 egunekoak izan ziren, batez beste, ospitaleratutako gaixoetan, eta bederatzi bat egunekoak anbulatorioetan.
“Azkenean A gripea ez zenez uste bezain oldarkorra izan, esan dezakegu emaitza horiek egoera normalean gripearen antzekoak izango liratekeela”, esan du Ikerketa Medikorako Udal Institutuko (Imim) taldeko koordinatzaile Jordi Alonsok.
