Errepideetako istripuak munduko heriotza-eragile nagusietako bat direla dioten estatistiken aurrean, segurtasun-osagarriak auto-fabrikatzaileen aurkezpen-gutun onena bihurtu dira. Airbag-a, magnesiozko bolanteak, gerriko adimendunak eta energia xurgatzeko aparrak dira ibilgailu gehienek urte batzuen buruan seriean eramango dituzten babes-osagarri eraginkorrenetako batzuk.
Gero eta utilitario seguruagoak egiteko premia hori dela eta, egiturek okupatzaileen eraginaren eta segurtasunaren aurrean duten portaera aztertzea izan da azken urteotan gehien bultzatu diren gaiak. Valladolideko Centro de Investigación y Desarrollo en Automoción (Cidaut) da ikerketa horietan aurreratuenetako bat. “Segurtasun aktiboko sistemez gain, istripua gertatu ondoren zauriak ahalik eta txikienak izan ez daitezen erabiltzen diren mekanismoak aztertzen ditugu”, azaldu du José Luis Moreno Cidaut-en atxikipen-sistemen arduradunak.
Gaur egun, utilitario gehienek airbag-a dute pilotuarentzat eta beste bat kopilotuarentzat, “bi urtean, auto guztiek serieko airbagak eramango dituzte”, esan du Morenok. Airbag-a nahiko produktu berria den arren, azkar eboluzionatu du, eta segurtasun-mekanismo horren etorkizuna gortinatxoko airbaga deritzenetatik pasatzen da -erabiltzailea leihatiletatik irten ez dadin ahalegintzen dira-, belaunetik -tresna-panelaren zatian kokatzen da eta errotulen gunea babesten du- edo oinetatik -pedalen eremuan, orkatilak babesteko.
“Benetako etorkizuna airbag adimendunak dira”, dio Javier Villacortak, talka-saiakuntzen zerbitzu-unitatearen arduradunak. Ibilgailuak oztopo mota eta presentzia detektatzeko sistema eta istripuaren larritasuna kalkulatzeko ordenagailua izanen ditu. “Baina garrantzitsuena segurtasun-uhalarekin konbinatzea da”, gehitu du Morenok.
Segurtasun-uhalak eserlekuetara ainguratuta egongo dira, monobolumenetan gertatzen ari den bezala, eta aurretenkagailu pirotekniko bat izango dute -istripua gertatu eta lehen unean uhala bidaiariari egokitzeko aukera ematen du-, eta esfortzu-mugatzaile bat ere izango dute -zinta gehiago ateratzen uzten du-. Bularraren gaineko presioa 900 kilotik 400 kilora pasatuko da. “Gerrikoarekin gelditzen ez den guztia beste osagai batekin konpentsatu behar da. Hemen airbag-a agertzen da”, esan du Alberto Negro proiektu-unitateko arduradunak.
Airbag-en segurtasunari buruzko kritikei erantzunez, utilitario berriek airbag-a izango dute pertsona mota bakoitzarentzat. “Airbagak jarlekuan eserita nor dagoen detektatuko du eta atxikitze-estrategia planifikatuko du”, azaldu du inpaktu-saiakuntzen zerbitzu-unitateko arduradunak. Airbag-ak partzialki (% 70) edo erabat (% 100) puzten dira, pertsonaren tamainaren eta pisuaren arabera. Gainera, segurtasun-mekanismo berriek kontuan hartzen dituzte beste faktore batzuk ere, hala nola emakumeak txikiagoak izaten direla eta bolantetik eta, beraz, airbagetik hurbilago esertzeko joera dutela.
