Estatu Batuetako Bihotzaren Elkarteak garrantzia kendu dio ardo beltzak bihotzaren osasunean izan dezakeen ahalmen onuragarriari, eta esan du, infartu-arriskua murriztu nahi bada, onena medikuarekin hitz egitea dela. Azterketa batzuen arabera, ardo beltzak kolesterola (“ona”) handitzen du, eta antioxidatzaile onuragarriak ditu. Hala ere, Bihotzaren Elkartearentzat onura horiek “zalantzazkoak” dira.
Estatubatuarren osasun kardiobaskularra zaintzen duen organismoak uste du “Paradoxa frantsesa” deritzonak, ardo gehien kontsumitzen duten herrialdeek bihotzeko gaixotasunen indize txikiagoak izateak, ez duela froga zientifikorik. Arriskua gutxitzeko, Circulation aldizkari medikoan adierazi duenez, eraginkorra da kolesterola, odol-presioa eta gorputz-pisua murriztea, ariketa egitea eta dieta osasungarria izatea.
Bihotzeko espezialistentzat, ardoaren kontsumoak, kasu batzuetan eragin onuragarria izan dezakeela ukatu gabe, arriskuak ditu, dosi txikietan ere ohitura sor baitezake. Gainera, ardo beltzaren bertuteak nabarmentzen dituzten azterketek egunean baso bat ardo baino gehiago hartzen ez duten kopuruei egiten diete erreferentzia. Mediterraneoko herrialdeetako batez besteko kontsumoak nabarmen gainditzen du neurri hori.
