Emozioak adierazteko ezintasunak nabarmen eragiten die paziente asmatikoei, eta gaixotasuna kontrolatzea zailtzen du, Pneumologiako eta Kirurgia Torazikoko Espainiako Elkarteko (Separ) adituek egindako azterketa baten arabera. Espainiako 33 ospitalek hartu dute parte lan horretan, eta arnas gutxiegitasunak eta alexitimiak duten harremanean jartzen du arreta. Desordena neurologikoa da, hain zuzen ere, pertsonak bere emozioak hitzez identifikatu eta transmititzeko duen ezintasuna. Arazo psikologiko horrek berebiziko garrantzia du, eta asma dutenen artean krisi hilgarriak eragin ditzake.
Asmaren aurkako Ekimen Globalaren (Gina) gida berrian jasotako ikerketak frogatzen du alexitimia duten gaixoek maizago pairatzen dituztela ia hilgarriak diren krisiak, beharbada asmaren sintomak ez dituztelako behar bezala hautematen eta horren arabera jarduteko gai ez direlako.
Datuak bildu ziren bi urteetan, 228 asma-krisi ia hilgarri izan ziren, baina ez zen alde nabarmenik hauteman adinaren, sexuaren eta patologiaren larritasunaren arabera ezarritako taldeen artean. Hala ere, alexitimia zuten pazienteen proportzioa askoz handiagoa izan zen krisi ia hilgarriren bat izan zuten pertsonetan (% 36) asma zuten baina inoiz izan ez zuten gaixoetan baino (% 13).
Azterketa horren emaitzak ikusita, pneumologoek uste dute terapia psikologikoek lagundu dezaketela alexitimia duten gaixoei asma-eraso larri horien maiztasuna murrizten. Hau da, asma-krisiak dituen pertsona batek bere sentimenduak eta emozioak adierazteko gaitasuna garatzen badu, bere osasun-egoerak iragarpen hobea izango du eta krisiak izateko aukerak gutxitu egingo dira.
