Nekazaritzarako eta Elikadurarako NBEren Erakundeak (FAO) eskoletan nutrizio-hezkuntza barne hartzen duten ikasketa-planak garatzeko gida bat argitaratu dela iragarri du. «Jende asko ez da konturatzen ez dela soilik elikagai-kopurua, baizik eta dieta baten kalitateak ondorio erabakigarria duela haurren hazkundean, osasunean eta ikasteko gaitasunean», adierazi du Ezzeddine Boutrif FAOko Nutrizio eta Kontsumitzailearen Babeserako Zuzendaritzaren arduradunak. «Jatea ez da prozesu biologiko hutsa, hartutako ohituren eta haiek hautemateko moduaren, testuinguru sozial eta kulturalaren araberakoa da. Horregatik da hain garrantzitsua nutrizio-hezkuntza», erantsi du adituak.
NBEren antolaketaren arabera, nutrizio-hezkuntza on batek baliabide mugatuak dituen dieta elikagarria lortzen, elikagaiak modu seguruan prestatzen eta maneiatzen, eta elikadura-jatorriko gaixotasunak saihesten irakats diezaieke haurrei. Halaber, amagandiko edoskitzearen eta elikadura osagarriaren onurak ikasten dituzte. «Eskoletan nutrizioa irakastea lagungarria izan daiteke etorkizuneko belaunaldien elikadurarekin lotutako gaixotasunen inpaktu ekonomiko garestia murrizteko. Gobernuek nutrizio-hezkuntza lehentasun bihurtu behar dute», azpimarratu du Boutrif-ek.
Ildo horretatik, gidak oinarrizko hiru elementu dituen zenbait baliabide eskaintzen ditu: elikaduran, osasunean eta hezkuntzan giltzarri diren ideiak eta prozesuak azaltzen dituen liburua; plangintza-lanean erabiltzailea orientatzen duen lan-orrien sorta, eta ikasketa-planen taula, garapen-bidean dauden herrialdeetako lehen hezkuntzako eskoletan nutrizio-hezkuntzarako ikasketa-helburuak ematen dituena.
