Diabetikoek haustura gehiago izan ditzakete, GlaxoSmithKline botikariaren Avadina sendagaiak hezurren deskaltzifikazio-prozesua azkartzen duen zelula batean eragiten duelako, “Nature Medicine” aldizkariak argitaratu duen azterlan baten arabera.
Farmako horrekin epe luzera egindako tratamenduak (errosiglitazona ere deitzen zaio) osteoporosia eragin diezaieke paziente diabetikoei, zelula osteoklastoen ekintza bultzatzen baitu, eta zelula horiek hezurra xurgatzen dute, lanaren arabera. Aurreko azterketek ere adierazi zuten sendagaiak hezurrak osatzen dituzten zelula osteoblastikoen jarduera eragozten zuela. Laborategiak onartua zuen bere sendagaiak, 2. motako diabetesa duten pazienteetan erabilia, handitu egiten duela tratamendua jarraitzen duten emakumeengan hausturak izateko arriskua, beste ikerketa batek frogatu zuenez.
Duela gutxi, gai aktibo horren albo-ondorioei buruzko beste aurkikuntza bat egin zen. Ikerketa baten arabera, 2. motako diabetesaren tratamenduan emandako zenbait sendagaik bikoiztu egiten dute pazienteak bihotzeko arazoak izateko arriskua, besteak beste, Avadina. Farmakoen eta Elikagaien Administrazio Federalak (FDA) sendagaiaren etiketan arrisku hori ohartarazteko eskatu zion botikariari.
