“International Journal of Epidemiology” aldizkarian argitaratutako azterlan batean argi geratu da haurdunaldian parazetamola erabiltzearen (bereziki haurdunaldiko lehen hiruhilekoan) eta haurrek arnas arazoak edo asma izateko arriskuaren arteko erlazioa.
Ondorio horrek duen garrantzia kontuan hartu behar da, parazetamola biztanleria osoak asko erabiltzen duen analgesikoa baita, eta, sarritan, mina arintzeko emakume haurdunek gehien erabiltzen duten medikamentuetako bat. Ikerketak erakutsi duenez, haurrak bere bizitzako lehen 18 hilabeteetan asma izateko arriskua %20 handitu da, eta ehuneko hori %50eraino igo da zazpi urterekin.
Lan horretan, Danish National Birth Cohort-eko 66.445 emakumeren jarraipena egin zen. Danimarkan 1996 eta 2003 bitartean izandako jaiotzei buruzko datu-basea da, eta parazetamolaren eta beste botika batzuen erabilerari buruzko informazioa jaso zen.
Manolis Kogevinas ikerketaren ikertzailearen arabera, badirudi baieztatu egiten dela haurren asma umetokian has daitekeela, hau da, jaio aurreko aldian. Ikerketak ondorioztatu duenez, gure gizartean haurren asmak duen prebalentzia handia dela eta, garrantzitsua da emaitza horiek kontuan hartzea, haurdunaldian, batez ere lehenengo hiru hilabeteetan, parazetamolaren praktika preskribatzailea berrikusteko.
