Parisko Pasteur Institutuko ikertzaile-talde batek molekula berri bat identifikatu du organismoan, eta eragozpen fisikoei aurre egiteko aliatu handi bihur daiteke. Opiorfina da, giza listuan dagoena eta minaren aurrean morfina bezain analgesiko ahaltsua izan daitekeena.
Ikerketa amaitu zenean, molekula berri horren injekzioekin tratatutako arratoiek morfinaz tratatutako karraskariek baino hiru aldiz dosi txikiagoa behar izan zuten, mina baretzeko. Kilogramoko miligramo bateko dosiarekin, opiorfinak 3-6 miligramo morfinarekin lortutako emaitza berak lortu zituen. Substantzia natural berriak min-sentsazioa kendu eta hantura murriztu zuen tratatutako animalietan.
Catherine Rougeot-en taldeak arratoi-talde baten min-sentsazioa kentzeko opifina isolatu eta sintetizatzeko erabili zuen metodoa “Proceedings” aldizkarian (Amerikako Zientzien Akademiaren aldizkaria) kontatzen da. Ikertzaileek diotenez, arratoietako mina inhibitzen zuen beste substantzia bat, sialorfina izenekoa, identifikatu zuten lehenago. Pentsatu zuten animalia horietan konposaturik bazegoen gizakietan ere bila zezaketela. Hain zuzen, Frantziako zientzialariek giza listutik ondo isolatu zuten opiorfina izeneko peptido txiki hori, eta arratoien sialorfinak bezalako proteinak inhibitzen zituela ikusi zuten.
Giza opiorfinak organismoaren sistema opioide endogenoa indartzen duen ahalmen analgesikoa du, gure espeziearen biziraupenean hain erabakigarriak izan diren sari-mekanismoak kontrolatzeaz arduratzen dena. Horrela, lesio bat dugunean, gorputzak alarma-mekanismoak aktibatzen ditu. Mina sentitzen dugu, eta nerbio-sistema zentralean, min hori jasanezina ez izateko adinako ahalmen analgesikoa duten substantziak askatzen dira.
Sistema natural hori ezagutzea oso garrantzitsua da jomuga terapeutiko berriak lortzeko eta minari aurre egiteko botika berriak lortzeko. Armategi terapeutiko zabalagoa garatzea funtsezkoa da minaren tratamendu kronikoan. Izan ere, morfinaren deribatu batzuk ahalmen analgesikoa galtzen dute organismoa ohitu ahala. Era berean, Pasteur Institutuko zientzialariek espero dute aurkikuntzak aukera emango diela organismoak erreakzio hori eragiteko opiorfina modu naturalean askatzen duen baldintzak identifikatzeko.
