Interneteko “Hiesa: larrialdi isila” atari berriak, Telefónica Fundazioak eta Munduko Medikuek sustatuak, gaixotasunari buruzko informazio espezializatua eskaintzen du. Gainera, GKE horrek hiesari aurre egiteko bultzatzen dituen ekintzen berri ere ematen du web guneak. Web gunea, “http://www.risolidaria.org.es/sida/”, RiSolidarioan dago, Telefónica Fundazioak berak sustatutako izaera humanitarioa zabaltzeko foroan.
Internet informazio- eta komunikazio-bide gisa aurkezten da, baina baita eztabaidarako, antolaketarako eta ekintzarako ere, Telefónica Fundazioak ziurtatzen duenez. Hori dela eta, “online” plataforma bat jarri du martxan Munduko Medikuekin batera. Plataforma horrek, HIESaren berri emateaz gain, iritzi publikoa sentsibilizatu eta GKEa gauzatzen ari den ekintzen berri ematen du, eta, horrez gain, aholkuak ematen ditu eta erabiltzailea gaixotasunaren aurkako borrokan inplikatu nahi du.
Era berean, atariak aukera ematen dio erabiltzaileari gaixotasunaren oinarrizko alderdiak, diagnostikoa eta tratamendua ezagutzeko, bai eta laguntza baliabideak eta terminoen glosarioa ezagutzeko ere. Epidemiak garapen bidean dauden herrialdeetan duen eraginari, tratamenduaren aurrerapenei eta Sarean gai honi buruz dauden esteka interesgarrienei buruzko informazioa ere jasotzen du web guneak.
Atarira sartzen den internautak, parte hartzeko arloari esker, GIB/HIESarekin lotutako gertaera garrantzitsuenen agenda kontsulta dezake. Gainera, ziberekintzak proposatzen dira herritarrak Milurtekoko Garapen Helburuen alde inplikatzeko, eta, teknologia berrien bidez, epidemiaren aurkako borrokan sentsibilizatzen saiatzen dira.
