Europako Batasunak (EB) labore transgenikorik ez duten eremu babestuak sortzea onartu du. Gainera, zenbait herrialdek genetikoki eraldatutako organismoen (GEO) laborantzak sortzen dituen kezkei aurre egiteko beste neurri batzuk hartzearen aldeko botoa eman dute.
Stavros Dimas Ingurumeneko komisarioak, Europako ministroekin egindako bileraren amaieran, honako hau adierazi zuen: “ezinbestekoa da Europako herrialdeek zeregin aktiboa izatea GEOen ondoriozko arriskuen ebaluazioan”. Iragarritako neurriari esker, estatu kideek GEOrik gabeko eremu babestuak ezarri ahal izango dituzte. Frantziako Ingurumen eta Ekologiako ministroak, Jean-Louis Borloo eta Nathalie Kosciusko-Morizet nabarmendu ziren, EBko buru baitira.
Elikagaien Segurtasunerako Europako Agintaritza (EFSA, ingelesezko siglak) izango da EBko labore transgenikoak baimentzeko arduraduna. Horrek eztabaida sortu zuen kide diren herrialdeen artean, GEOek epe luzera osasunean dituzten ondorioak ez jakiteagatik. Horregatik, haien eraginak ebaluatzeko sistema berria eskatu zen.
Estatu kideek, halaber, hazi konbentzionaletan GEOak egotearen atalaseak ezartzearen alde egin zuten, erabiltzaileentzako berme gisa, genetikoki eraldatutako hazi konbentzionalen eta ekologikoen artean aukera erreala egon dadin.
