Indarra hartzen ari diren herrialdeen elikadura-segurtasuna bermatzeko, ezinbestekoa da nekazaritzako produktuen truke komertzialetarako oztopoak gutxitzea eta sektoreari laguntza zehatz bat ematea, atzo Ekonomia Lankidetza eta Garapenerako Erakundeak (ELGA) adierazi zuenez.
Prezio-ezegonkortasuneko ingurune batean “kontsumitzaileen karga arintzeko” eta “elikagaien hornidura bermatzeko” 2006-2008 bitartean sortzen ari diren sei herrialdek hartutako neurriak “Ekonomia berrien nekazaritza-politikak: 2009ko jarraipena eta ebaluazioa” txostenean aztertu ditu erakundeak.
Gorabideko ekonomia horietan sektorearentzako laguntza publikoak batez beste %26tik beherakoak izan ziren ELGAko kideen artean. Hala, Txilek %4 izan zuen; Brasilek eta Hego Afrikak %6; Txinak eta Ukrainak %9 inguru, eta Errusiak %14.
Aztertutako aldian, ekonomia horiek jarraitu zituzten ekimen ohikoenak izan ziren elikagaien gaineko inportazio-eskubideak murriztea edo etetea, edo esportazioari oztopoak jartzea. Hala ere, txostenaren egileek onartzen dute oztopo horiek ez dutela laguntzen elikagaien segurtasuna, eta kalte egiten dietela nekazari nazionalei eta, hedaduraz, inportazioen mende dauden bazkide komertzialei.
