AZTI-Tecnaliak, itsasoaren eta elikagaien ikerketan espezializatutako zentro teknologikoak, zitrikoen eta gariaren prozesatzearen ondoriozko azpiproduktuen aprobetxamendua aztertzen du, akuikulturarako elikagai eta pentsu berriak sortzeko. Ikerketa hori Europako eta Indiako enpresa eta zentro teknologikoen partzuergo baten barruan egiten da, eta Europako 7. Esparru Programaren finantziazioa du, Espainiako institutuak jakinarazi duenez.
NAMASTE proiektuaren helburua da industrialki aplika daitezkeen estrategia berritzaileak garatzea, zitrikoak eta garia prozesatzearen eta tratatzearen ondoriozko azpiproduktuei balioa emateko, osagai natural eta molekula bioaktibo bihur daitezen, hala nola zuntz dietetikoak, prebiotikoak, fruta-pastak, biobanillina eta abar. AZTI-Tecnaliak azaldu duenez, etorkizunean Europako eta Indiako merkatuetan merkaturatu ahal izango diren elikagai berriak eta akuikulturarako pentsuak garatzeko erabiliko dira elementu horiek.
NAMASTek Europako eta Indiako enpresa eta zentro teknologikoen partzuergoaren artean ezagutzak eta metodologiak trukatzea ere sustatzen du. Harreman horrek “herrialde desberdinetako ikertzaileen arteko elkarreragina bultzatzen du eta esparru egokia ezartzen du India eta Europako enpresen artean joint-ventureak sortzeko”, nabarmendu du Espainiako zentro teknologikoa. Programaren beste helburuetako bat elikagaien segurtasuna eta ingurumenaren zaintza dira. Hori dela eta, garatutako produktu berrien kalitate kimikoa eta mikrobiologikoa ebaluatuko dute zientzialariek, baita azpiproduktuak eraldatzeko erabilitako prozesuen ekonomia- eta ingurumen-jasangarritasuna ere.
Boloniako Unibertsitatea (Italia) buru duen NAMASTE proiektua osatzen duten Europako enpresa eta zentro teknologikoak hauek dira: Institute of Food Research (Erresuma Batua), Campden BRI (Hungaria), Agrotechnology and Food Innovations (Herbehereak), Grupo Leche Pascual (Espainia), J. Rettenmeier & Söhne (Alemania) eta AZTI-Tecnalia. Aldi berean, Indian beste lantalde bat sortu da, aipatutako Europako erakundeekin lankidetza estuan lan egiten duten enpresek eta ikerketa-zentroek osatua. Programan planifikatutako jarduerak 2010ean hasi ziren eta 2013aren hasieran bukatuko dira.
