Urriaren 1etik aurrera, Telefónicak herriko deien prezioa igoko du. “Tarifazoak” eragingo du 3 minutuko dei bat %51,4 garestiagoa izatea astelehenetik ostiralera 18:00etatik 20:00etara, %25,3 egun horietan 8:00etatik 18:00etara eta %23,2 gainerako ordutegi eta egunetan”, esan du FACUA kontsumitzaileen erakundeak.
Operadoreak egun horretatik aurrera bateratuko ditu finkotik herriko eta probintziako zenbakietara egiten diren deiei aplikatzen zaizkien tarifak. Neurri horrek lau milioi erabiltzaileri eragingo die, finkoetarako deien tarifa finkorik ez dutenei. Horrela, tarifak honela banatuko dira: batetik, probintzia berean egindako deiei eragiten dietenak —herri barrukoak eta probintziakoak— eta, bestetik, bi probintziatan egiten direnak —probintziartekoak—.
Bateratze horrek prezioen igoera ekarriko du. Deiaren ezartze-kostua 7,2 zentimokoa izango da tarifa metropolitarrerako, eta 9,2koa probintziako eta probintziarteko tarifetarako; estatuko dei guztietarako, berriz, 10 zentimokoa.
Ordutegi arruntean, herriko deien minutuko prezioa 1,4431 zentimotik (gehi BEZa) 1,5 zentimora pasatuko da, hau da,% 3,9ko igoera. Ordutegi murriztuan, 0,7 zentimotik 0,6 zentimora jaitsiko dira minutuko (-% 23).
18:00etatik 20:00etara, minutuko prezioa %92,4 igoko da; izan ere, orain arte ordutegi murriztuan tarifatzen ziren bi ordu horiek normalera pasatuko dira, dio FACUAk. Hala, herriko deien ohiko ordutegia astelehenetik ostiralera izango da, 8:00etatik 20:00etara. “3 minutuko metropoli-deia, egun ordutegi arruntean 11,5 zentimo eta ordutegi murriztuan 9,5 zentimo kostatzen dena, 14,5 eta 11,8 zentimo izango da, hurrenez hurren”, adierazi du erabiltzaileen elkarteak.
