100 euroko ordenagailu eramangarriak badu izena: 2B1. One Laptop Per Child irabazi asmorik gabeko erakundearen proiektua da (“Ordenagailu eramangarri bat haur bakoitzarentzat”), eta informatika leku behartsuenetara eramatea du helburu.
2B1 ordenagailua eta haririk gabeko bideratzailea da, eta horrek Interneteko konexioa erraztuko du. Gainera, 7,5 hazbeteko TFT pantaila du, 1.200 x 900 pixeleko bereizmenarekin, eta oso energia gutxi kontsumitzen du.
Haren beste ezaugarrietako bat da 2B1biradera baten bidez birkarga daitekeela; beraz, ez da beharrezkoa korronte elektrikora entxufatzea. Berrikuntza horri esker, elektrizitaterik ez duten eremuetara eramango da.
Funtzionamendu azkar eta egokia bermatzeko, eramangarriak Linux “Fedora” softwarearekin funtzionatuko du, hezkuntza-lanetarako bereziki diseinatutako interfazearekin. Horrez gain, 128 megako RAM memoria eta 512 megako flash memoria izango ditu, 400 megahertzera doan AMD Geode prozesadorea, hiru USB ataka, SD txartelentzako zirrikitua, “jack” larakoa eta kamera eta bozgorailuak integratuta.
Abismo digitala
Nicholas Negroponte One Laptop Per Childen sortzaileak ordenagailu bat jarri nahi du noizbait Hirugarren Munduko etxe bakoitzean. Haren iritziz, “ordenagailua da modu bakarra ikasleei XXI. menderako beharrezkoak diren trebetasunak benetan eskuratzeko”.
Proiektu honetarako inspirazioa 1999an etorri zitzaion Negroponteri, Kanbodiara egindako bisita batean, berak eta bere emazteak emandako ordenagailuek baliabiderik gabeko haurrengan izan zuten eragin erabakigarria egiaztatu zuenean. Berehala, kostu txikiko ordenagailu eramangarri bat sortzeko aukerari buruzko kalkuluak egiten hasi zen, ordenagailu konbentzional baten prezioaren erdia publizitate- eta marketin-gastuekin lotuta dagoela jakinda.
Negropontek diseinatutako ordenagailuak aberatsen eta pobreen arteko amildegi digitala murrizten lagun lezake. Aurten 15 milioi unitate ekoitziko direla aurreikusten da, eta 2007an 150 milioi izango direla urtean. Horri esker, prezioak merkatuko dira. Brasil, Txina, Egipto, Thailandia eta Hego Afrikatik hasiko da banaketa.
