Uda honetarako, Espainiako zenbait GKEk turismo arduratsuko, lankidetzako eta bidezko merkataritzako bidaiak eskaintzen dizkiete garapen-bidean dauden herrialdeei, eskualde horien errealitate kultural eta sozialak ezagutarazteko.
Hala, Acsur Las Segoviasek bi turismo-bidaia prestatu ditu, Argentinako Misión hirira hain zuzen ere. Bidaia horiek 20 eguneko iraupena izango dute abuztuan eta irailean, nekazarien, ekologisten eta indigenen elkarteak bizi diren komunitateetan garatzen ari diren lan-proiektuen bidez herrialdearen errealitatea ezagut dadin.
Amazonia Asanbladak, oihan tropikalak defendatzeko sortutako erakundeak, hainbat sentsibilizazio-bidaia antolatu ditu Ekuadorrera uztailean, abuztuan eta irailean. Bidaia horietan, turistek eskualdeko kulturen berri izango dute.
Carlos Laborde Fundazioak (Funcal), udako hilabete hauetan, lau bidaia solidario egingo ditu Peruko Amazoniara bi alditan -lehenengoa, hilaren 16tik 31ra, eta hurrengoa, abuztuaren 10etik irailaren 3ra bitartean-. Bidaia horiekin, erakunde honek proiektu bat jarri nahi du martxan Urubamba Behereko komunitateen garapen ekonomikoari laguntzeko, turismo iraunkorraren bidez.
Bestalde, Vicente Ferrer Fundazioak bi eta hiru aste bitarteko bidaiak antolatzen ditu urte osoan India ezagutzeko, hiru ibilbideren bidez -Hegoaldeko, Iparraldeko eta Rajastango ibilbideak-. Bidaia horiek Anantupurren amaitzen dira, eta egun batzuetan Fundazioko kideekin bizitzeko aukera ematen dute, herrialde horretan garatzen diren proiektu solidarioak gertutik ezagutzeko.
Aipagarria da, halaber, gazteentzako nazioarteko trukeen eskaintza zabala: Togo, Beirut, Turkia, Egipto, Kuba, Errumania, Polonia, Ingalaterra, Frantzia eta Portugal. Kultura arteko Animazioko Baliabideak (RAI) proposatzen ditu, herrialde horien errealitate desberdinak ezagutzeko.
Setem GKEak hegoaldeko herrialdeetara hurbiltzearen alde egiten du, interes kultural eta naturaleko lekuak bisitatuz eta, aldi berean, India, Brasil, Ekuador, Maroko, Senegal eta Benin bezalako herrialdeetako errealitate soziala ezagutuz.
