Microsoftek erabiltzaileen datuak gordetzeko denbora murriztu behar du, orain 18 hilabetez gordeta baitaude, atzo Datuak Babesteko Espainiako Agentziak (AEPD) eskatu bezala. Artemi Rallo AEPDko zuzendariaren eta Brendon Lynch Microsoft-eko Pribatutasun Estrategien zuzendariaren arteko bileran egin zen eskaera.
AEPDk azaldu zuenez, Internet bidez egindako bilaketetatik ateratako datu atxiki horien artean, erabiltzailearen identifikazioa ahalbidetzen dutenak daude, hala nola IP helbidea eta erabiltzailearen lehentasunak gordetzen dituzten gailuen erabileraren ondoriozkoak, “cookie” deritzenak. Bestalde, Microsoft-eko ordezkariak ziurtatu zuen ez dagoela berehalako mezularitza-zerbitzuaren (Messenger) erabiltzaileek egindako komunikazioetako daturik atxikitzerik, edo mezu elektroniko bat ezabatzean, berehala suntsitzen dela.
Horrez gain, informatika-konpainiak bermatu zuen posta elektronikoko edukiak spama eta birusak detektatzeko bakarrik iragazten direla, eta zerbitzu baten erabiltzaileei buruzko informazioa ez zaiela hirugarrenei jakinarazten, bitarteko gisa agindu judizialik izan gabe. Multinazionalak, halaber, datuak ezabatzeko banakako eskaerei erantzuten zaiela baieztatu zuen.
AEPDk ekainean Yahoo, Google eta Microsoft-i eskatu zien informazioa bidal ziezaiotela bilaketa-motorrek erabiltzaileen pribatutasunean duten eragina ebaluatzeko eta konpainia horien pribatutasun-politikak indarrean dagoen datuak babesteko araudira zenbateraino egokitzen diren jakiteko.
