Azaroaren 12tik 14ra, Kataluniako Oberta Unibertsitateko (UOC) E-learning Unesco Katedraren Nazioarteko V. Mintegia egingo da Bartzelonan. Oraingo honetan, eten digitalari eta hezkuntzaren bidez izan ditzakeen konponbideei buruz arituko dira.
“Hezkuntzaren bidez eten digitalari aurre egitea” lemapean, hainbat herrialdetako adituek problematika hori desagerrarazten laguntzen duten faktoreak aztertuko dituzte, hau da, mundu osoko hainbat herritar-komunitateri eragiten dien informazioaren gizartera iristeko aldea.
“Mintegiaren lehen helburua da arazoari eman dakizkiokeen irtenbideak eztabaidatzea, antolatzea eta esperientzia arrakastatsuak aztertzea, non Informazioaren eta Komunikazioaren Teknologiek (IKT) zeregin garrantzitsua izan baitute hezkuntzaren garapenean”, nabarmendu dute topaketaren antolatzaileek. Topaketa Drassanes etorbideko (Bartzelona) 3-5 zenbakiko eraikineko areto nagusian egingo da.
Eten digitalak eragin zuzena du hezkuntzan. Horregatik, “hezkuntza-sisteman IKTak sartzeko ahalegina oso lagungarria izan daiteke alde horren aurka borrokatzeko”, adierazi dute antolatzaileek, eta nabarmendu dute azken helburua hezkuntzak eten digitalari aurre egiten lagun dezakeela frogatzea izango dela.
Topaketa horretan, One Laptop per Child, Schoolnet Africa, Wikimentitatea eta Open Research Society bezalako esperientziak aztertuko dira, “teknologiaren erabilera intentsiboaren bidez irekitako hezkuntza sustatzeak ezagutza irekia modu antolatuan eskuratzeak sortzen duen arazo berri hori konpontzen lagun dezakeela ikusteko”.
