Internauten Elkarteak (AI) “Alertvir” izeneko birusen kontrako programa bat jarri du abian. Programa hori ordenagailuan instalatzen da, eta, handik, erabiltzaileak ohartarazten ditu nabigatu aurretik, birus berrien edo Interneteko edozein segurtasun-arazoren berri izan dezaten.
Erakundeak komunikatu batean adierazi duenez, Sareko II. Segurtasun Kanpaina amaitu ondoren, AIk egiaztatu du internauta asko ez direla maiz sartzen segurtasuneko berariazko web orrietara, hainbat arrazoirengatik -konexio azkarrak egitea, ezjakintasuna edo behar ez dela uste izatea-, eta arazo jakin bat dagoenean soilik joaten direla leku horietara.
Programa doakoa da eta 18 KB betetzen ditu. Internautari jakinarazten dio indarrean dauden segurtasun-alertak ordenagailura jaits ditzala, Internetera konektatzen den aldiro -edo hamabostean behin Sarearekin etengabeko konexioa izanez gero-.
“Alertvir” proba gisa aurkeztu zen Sareko Segurtasunaren II. Kanpainan, eta harrera ona izan zuenez, Ai.A.k programa hori bere webgunean (www.internautas.org) deskargatzeko gune berezi bat eskaintzea erabaki du, internautek eskatzen dituzten segurtasun-alderdiei buruzko informazio osagarriarekin.
