Atzo aurkeztu zen Bartzelonan energia elektrikoa banatzeko munduko kablerik ahaltsuena sortzeko proiektua. Horrela, eskaera puntualki handitzeak sortzen dituen arazoak saihestuko dira, egungo sistemek baino bost aldiz energia elektriko gehiago garraiatuko baitu.
Kable horri beste gailu supereroale batzuk gehituko zaizkio, hala nola sorgailuak, transformadoreak, motorrak edo korronte-mugatzaileak. Proiektuaren arduradunen arabera, sistema horien eraginkortasunari esker, elektrizitatea sortzean sortzen diren karbono dioxidoaren (CO2) emisioak murriztu eta, aldi berean, instalazioen segurtasuna handitu ahal izango da.
“Proiektua ezinbestekoa da; izan ere, egungo sistema elektrikoak, maila susmagaitzeraino menderatzen dugunak, ezingo du eskaera bete. Adibide berri bat Bartzelonako hornidura-arazoa da. Gaur egungo energia-sareak ez dira nahikoak” esan zuen Xavier Obradors ikerketa-zuzendariak. Bartzelonako Materialen Zientzia Institutuan lan egiten du, Ikerketa Zientifikoen Goi Mailako Zentroan (CSIC).
30 metro luze
Kable berriak orain arte erabilitako korronte-mailarik altuena erabiliko du: 3.200 ampere korronte efektiboko balioarekin, eta 600 ampere gaur egun. Lehen modeloak 30 metroko luzera eta 111 megavoltioampereko potentzia izango ditu.
“Sistema supereroale berriekin, sistema elektrikoa seguruagoa, eraginkorragoa eta garbiagoa izango da, transformadoreak suaren kontrakoak izango baitira eta korronte-mugatzaileak erabiliko baitira transformadoreen eta sorgailuen kate-deskonexioa saihesteko. Era berean, energia berriztagarriak energia elektromagnetikoen metagailuekin sartzea erraztuko dute, eta energia horiek energia-tapoi gisa erabiliko dira une batez, elektrizitate-eskaria handitzen denean”, nabarmendu zuen Obradorsek.
Teknologia berri horri esker, gainera, goi-tentsioko linea elektrikoen ingurumen-inpaktua murriztuko da. “Sistema elektriko supereroale batek eskaera horri erantzutea erraztuko luke, eta, aldi berean, klima-aldaketa eragiten duten gasen ekarpena murriztuko luke”, zehaztu zuen zientzialariak.
