Microsoft informatikako erraldoiak robotentzako sistema eragilea merkaturatu du. Microsoft Robotics Studio izenarekin, Bill Gates-en enpresak robot errealak edo simulatuak programatzen dituztenen lana erraztu nahi du, eta, bide batez, robotikaren industrian posizio garrantzitsuagoa hartu.
Konpainiak jakinarazi duenez, Microsoft Robotics Studiok era guztietako robotak programatzeko balio du, bai jostailuzkoak, bai industrietan erabiltzen direnak, eta ikertzaileen eta zaleen eskura egongo da doan.
Microsoft ekainean sartu zen eremu horretan, softwarearen aurretiko bertsio bat merkaturatu zuenean eta gai horretan espezializatutako ikerketa-talde berri bat sortu zuenean. Ordutik, kalkulatzen du 100.000 aldiz baino gehiagotan jaitsi dela Interneteko programa hau akademiko, zale eta enpresek.
Ekimenak robotikaren helmena zabal lezake eta zaleei ekintzaile izateko aukera eman.
Nazioarteko Robotika Federazioaren zifrak biltzen dituen Microsoften arabera, aurten milioi bat robot pertsonal inguru salduko dira. Kopuru hori oso txikia da kaleratuko diren ordenagailu-kopuruarekin alderatuta, baina hurrengo urteetan merkatu hori nabarmen haziko dela espero da.
