Espainiako Twitter sare gisa ezagutzen den Picotea.com sarea mediablogging-era abiatu da, eta, horretarako, kanal-zerbitzu berri bat ireki du, komunikabideek beren edukiak doan argitaratzeko aukera izan dezaten. Zerbitzu berriak hedabideentzako tresna berezi eta doakoak ditu, eta horiei esker testu, audio edo bideo edukiak argitara ditzakete, erabiltzaileek mikroblogging bidez iruzkindu ditzaten.
Kanal horien edukiak eskuz edo automatikoki eguneratu ahal izango dira RSS bidez, eta, hala, horiek eguneratzeko ahalegina minimizatu egingo da. Picotea.com-en barruan, kanalek beren izaera izango dute, eta horrek garrantzi handiagoa emango die atarian. Gainera, etorkizun hurbilean, kanalek Premium bertsioa izango dute, komunikabideei beren publizitate-euskarriak beren kanalean sartzeko aukera emango diena.
Gaikako kanal horiek aukera emango diete erabiltzaileei “albisteak irakurtzeko, irratia entzuteko edo telebista euskarri beretik ikusteko”, adierazi zuen Expansoft mikroblogging-sare horren atzean dagoen enpresa sortu eta zuzendari nagusiak, José Luis Fernández Frontelok. “Atarian bertan integratutako edukiak edukitzea onuragarria izango da erabiltzaileentzat, ez baitute beste web orri batzuetara joan beharko bilatzera, eta komunikabideentzat ere bai, Picotean edukiak zabaldu eta sustatzeko beste bide bat aurkituko baitute”, gehitu zuen.
Picotea.com mikroblogging-zerbitzu bat da, joan den irailaren 1ean sortua eta ExpanSoft konpainia espainiarrak garatua. Twitter-en oso antzekoa, 160 karaktereko mezuen bidez komunikatzen dira erabiltzaileak. Bere ezaugarrien artean, taldeak eta ekitaldiak sortzeko edo horietan sartzeko aukera dago, baita erabiltzaileak Twitter, Facebook eta Friendfeedon dituen argitalpen guztiak sinkronizatzeko aukera ere.
