Hegazkin-konpainien eskaerek oihartzuna izan dute Bruselan, Jacques Barrot Europako Garraio komisarioan, hain zuzen. Komisario horrek presio egiten die aireportuetako kudeatzaileei tasa gardenagoak eta, ondorioz, baxuagoak aplika ditzaten.
Egia esan, kostu txikiko hegazkin-konpainiak agertu ondoren, aireportuak bidaiariei kobratzen dizkien tasak baino merkeagoak aurki daitezke Interneten. Hori dela eta, orain dela egun batzuk aurkeztutako zuzentarauak alderdi hori jasotzen du, baina oraindik ere Europar Batasuneko Garraio Ministroen Kontseiluaren oniritzia jaso beharko du.
Aurrera eginez gero, aireportuek airelineei argi eta garbi adierazi beharko diete zer tasa kobratzen dizkieten lurreratze, aparkaleku, terminalen erabilera eta segurtasun neurriengatik. Era berean, eta azken hilabeteotako hegazkin-konpainien eta aireportuen arteko gatazkak berriro gerta ez daitezen, sektorearekiko independentea den erregulatzaile bat izendatu beharko litzateke herrialde bakoitzean. Tasak finkatzeko gardentasunaren betebeharra eta erregulatzaileak sortzea bateratzeak beherapenak ekarriko ditu, Europako Batzordearen aurreikuspenen arabera.
Bruselak aitortzen du, kostu txikiko airelineei dagokienez, aireportuetako kudeatzaileek eskubidea dutela ohiko konpainia batek baino gutxiago kobratzeko zerbitzuagatik, “betiere ematen zaion zerbitzua berdina ez bada”, zehaztu zuen Barrotek.
Kontsumitzaileei dagokienez, elkarte batzuek alarma-abisua eman dute aireportu batzuek beren azpiegiturak mantentzeko eta airelineak lurreratzeko kostuak bidaiariei transferitu dizkietelako. Horrela azalduko lirateke aireportuko instalazio batzuek kobratzen dituzten tasa handiak.
