Europako zeruetan eta aireportuetan izango diren auto-pilaketek konponbidea izango dute Europako Batasunak sustatutako SESAR industria-proiektuari esker, Daniel Calleja Europako Batzordeko Aireko Garraioaren zuzendariak adierazi zuenez.
“Dentsitate-handitze garrantzitsu horri aurre egiteko, beharrezkoa da iraultza teknologiko bat egitea, Europako zerua berrantolatzean oinarritua”, esan zuen Callejak globalizazioari eta abiazioari buruzko ikastaro batean, Santanderreko Menéndez Pelayo Nazioarteko Unibertsitateak antolatuta. SESAR programak EBk (Galileo izenaz ezaguna) antolatu zuen satelite bidezko nabigaziorako diseinatu zen eredu instituzionala imitatzen du. Horretarako, “egitura bat sortuko da, proiektuaren osotasuna, kudeaketa eta finantziazio-iturri publiko nahiz pribatuak lortzea bermatzeko”, azaldu zuen Callejak.
Proiektu honen oinarri dira komunikazio-sare segurua eta ahalmen handikoa, prozesuen automatizazioaren funtsezko hazkundea, satelite bidezko nabigazioaren integrazioa abiatze-unetik lurreratu arte, eta korridoreak eta aire-bideak optimizatzea, ingurumen-inpaktua eta erregai-kontsumoa murriztuz.
EEko Aireko Garraioaren zuzendariak esan zuen Bruselak aurkezten duen “iraultza teknologikoa” beharrezkoa dela, batez ere, 2025erako egindako azterketek aireko trafikoan %250 egin dutela gora uste denean. “Eta horrek zerua ez ezik, azpiegiturak ere badakartza”, esan zuen.
2025erako, Europako 60 aireportu baino gehiago egongo dira pilatuta, eta 20 aireportu garrantzitsuenak egunean bederatzi orduz baino gehiagoz egongo dira saturatuta; beraz, muga handiak izango dira aireratze eta lurreratzeetan. EBk uste du SESAR programaren aplikazioak hirukoiztu egingo duela aireko trafikoa kontrolatzeko azpiegituraren ahalmena, eta hamar aldiz handituko duela operazio-segurtasuna.
