Oporretan apartamentuak alokatzea aukera bat da familia askorentzat; izan ere, KIUBek eta kontsumitzaileen erakundeek udan izaten dituzten erreklamazio eta kontsulten kopuruak erakusten duenez, ez dago arriskuetatik libre.
Ostatu turistiko gisa apartamentu bat alokatzea, hasiera batean, oporrak pasatzeko aukera merkeagoa da. Baina kontuz ibili behar da. Adibidez, iaz, Andaluziako Kontsumitzaileen Batasunak 1.382 kontsulta eta erreklamazio erregistratu zituen. Kexa gehienen arrazoia izan zen apartamentuak adostutakoa baino kategoria apalagokoak zirela, higiene falta zutela, hondartzatik bereizten zituen distantzia iragarritakoa baino handiagoa zela, itundutakoa baino ahalmen txikiagoa zutela edo etxetresna elektrikoek ez zutela funtzionatzen.
Hori guztia ikusita, oporretako atsedenaldia eralda dezaketen arazoak ahalik eta gehien murrizteko, honako hau gomendatzen da:
–Garaiz hasi apartamentua bilatzen, prezioak eta kalitateak alderatu ahal izateko.
– Idatzizko kontratua eskatzea. Ahozko akordioak legezkotzat jotzen diren arren, ez dira gomendagarriak, gero, desadostasunik sortzen bada, oso zaila baita horiek konpontzea.
– Kontratua sinatu aurretik, arretaz irakurri. Klausula batean maizterrak onartzen badu apartamentua behar bezala erabiltzeko moduan eta altzariz jaso duela, egiaztatu egin behar du, eta, akatsik bada, adierazi. Ematen diren gauzak biltzen dituen klausula edo inbentariorik ez badago, ostatuaren jabeak frogatu beharko du zein egoeratan zegoen, egonaldiaren aurretik eta ondoren.
–Adostutako prezioak ur, elektrizitate, gas eta abarren horniduraren gastuak barne hartzen dituen zehaztu behar du dokumentuak.
– Publizitate-liburuxkak ez dira nahasgarriak izango. Argi utzi behar dira eskaintzan sartzen diren zerbitzuak eta aukerakoak. Adibidez, igerilekuak, aulkiak, hamakak, toldoak, kanpoko aparkalekuak…
–Apartamentuaren jabeak aurrerakina eska dezake seinale gisa. Erreserba bakoitzeko eska daitekeen gehieneko zenbatekoa prezio osoaren %40 izango da, hilabete bat baino gutxiagorako egiten bada, %25 hilabete baterako erreserbetan eta %15 gehiago egiten bada.
– Erreserba ezeztatuz gero, apartamentuaren titularra seinalearen %5 gera daiteke gehienez, baldin eta deuseztapena apartamentua okupatzeko finkatutako eguna baino 30 egun lehenago egiten bada, %50 30 egun edo gutxiagorekin eta zazpi egun baino gehiagorekin egiten bada, eta %100 zazpi egun baino gutxiagorekin egiten bada.
– Nolanahi ere, ordaintzen diren ordainketa guztien ordainagiria eskatu behar da. Ordainagiriak, fakturak, kontratuak eta publizitate liburuxkak oso erabilgarriak dira erreklamazio bat egin behar izanez gero.
–Gatazkarik izanez gero, kontratazioa agentzia batekin egin bada, ez dago zalantzarik erreklamazio-orriak betetzeko.
