Alokairu-kontratuen %20k arbitraje-klausulak dituzte errentatzailearen eta errentariaren artean sor daitezkeen gatazkak prebenitu eta konpontzeko. Horrek esan nahi du zazpi puntu inguruko igoera izan dela iazko tasarekin alderatuta (%13). Gainera, Etxebizitza Alokairua eta Sarbidea Sustatzeko Elkarteak (Arrenta) adierazi zuen aurten lau errentamendutik bat “arbitraje-hitzarmen batekin” sina daitekeela.
Arbitraje-klausulen gehikuntza hori krisiari egozten zaio, “jabeen mesfidantza areagotu egin baitu”. Arrentaren arabera, “jabeen %85 beldur da ez ote dituen errentak kobratuko edo etxebizitzan kalteak jasango”, eta, beraz, ez da errentamendu-kontratu bat sinatzera arriskatuko, baldin eta estaldura gehigarri bat ez badu eta horrek lasaitasuna ematen badio. Arbitrajeaz gain, errenten kobrantzarako bermeak edo ekintza bandalikoen aseguruak barne hartzen dituzte kontratuek.
Arbitrajea Justizia Arruntaren bide paraleloa eta ordezkoa da; horren bidez, bi alderdiren edo gehiagoren arteko gatazkaren kasuan, hirugarren neutral eta inpartzial batek, arbitro deritzonak, nahitaez bete beharreko laudo batekin (epaia) ebazten du eztabaida, ezin baita errekurtsorik aurkeztu eta betearazi.
Arrentak nabarmendu du formula azkarra, ekonomikoa eta eraginkorra dela, askoz ere azkarrago lortzen baita epai irmoa. Arintasun horri esker, batez beste sei hilabete aurrezten dira epaitegietara joatearekin alderatuta.
