Nos próximos días, miles de persoas volverán aos seus fogares despois de gozar das vacacións. A volta á rutina non é fácil e menos cando hai que pór ao día a casa, a neveira está baleira e hai poucas ganas -ou pouco tempo- de cociñar. Cando se chega cansado tras unha viaxe e queda todo por facer, un dos primeiros pensamentos é comprar a comida xa feita: encargar unha pizza, baixar ao bar, ir a por unhas hamburguesas ou tirar de alimentos precocinados. No entanto, hai maneiras de mellorar o menú do regreso sen pasarse horas e horas na cociña. Algúns alimentos son clave para iso.
Contar cun bo fondo de despensa -e de conxelador- é moi importante para alimentarse ben e ter opcións saudables ao alcance da man, sobre todo nos días de máis preguiza gastronómica. Canta maior sexa a variedade de alimentos, maior será tamén a diversidade de pratos e receitas que se poidan preparar, pero hai uns básicos indispensables que poden facilitar moito este labor. Estes son cinco deles:
1. Pasta ou arroz
Un paquete de pasta ou de arroz, ademais de ter unha vida útil longa, pode sacar dun apuro. Ambos son alimentos prácticos, económicos e versátiles, de modo que se poden preparar de moi diversas maneiras: sós, cun pouco de salsa de tomate ou pesto, salteados con trocitos de verduras, con conservas, en sopa, en ensaladas, gratinados ao forno cun pouco de queixo… Tanto a pasta como o arroz son alimentos saudables e que sacian, en especial cando son integrais.
2. Alimentos e salsas en conserva
Xa sexa como acompañamento, como base ou como protagonistas, os alimentos en conserva poden dar moita vida na cociña. Unhas sardiñas en lata, un pouco de atún e uns pementos asados convértense con rapidez nunhas tostas estupendas e vistosas cando se combinan cun pouco de pan. As verduras en conserva poden resolver un salteado ou unha guarnición, mentres que hai moitas opcións para preparar ensaladas con legumes en conserva. As salsas, por outra banda, axudarán a complementar diversos pratos.
3. Ensaladas exprés
Os alimentos de quinta gama véndense xa preparados para un consumo inmediato. As ensaladas envasadas en bolsa, lavadas, cortadas e listas para o seu uso son un exemplo claro deste tipo de pratos. Estas verduras de folla verde pódense combinar con legumes en conserva ou con trocitos de atún, unhas olivas ou uns tomatitos cherry. E se se teñen en casa uns froitos secos (sen sal) ou unhas sementes, poderase mellorar aínda máis o sabor e a textura dunha ensalada rápida.
4. Pan
Pode ser a base dunha tosta, o acompañamento dun prato de verduras, de pasta ou de arroz. Tamén pode empregarse tostado en trocitos nunha ensalada ou untarse con alimentos saudables, como o guacamole ou o hummus. O pan dá moito xogo na cociña e é un alimento saudable, en especial cando é integral.
5. Froita
Dá igual se se trae de viaxe no coche ou se se vai un momento ata a frutería ou o supermercado para adquirila: a froita de tempada constitúe un alimento crave que sempre debe estar presente na dieta. Pódense comprar distintas froitas e presentalas combinadas en trocitos, como unha macedonia ou en espetos, enteiras ou licuadas cun pouco de leite. En calquera destes formatos, será a mellor sobremesa posible.
