O programa de distribución de froita nas escolas europeas, co que se busca combater a obesidade infantil, foi aprobado onte no Parlamento Europeo. Os deputados solicitaron repartir unicamente froita producida na Unión Europea (UE) e que non fose procesada. Ademais, suxeriron dar prioridade aos produtos ecolóxicos, locais e de tempada, e propuxeron ampliar a distribución aos nenos en idade preescolar. A Eurocámara esixiu tamén dotar ao programa con 500 millóns de euros para o curso 2009-2010.
Aínda que os eurodeputados mostráronse de acordo en liñas xerais coa proposta da Comisión Europea, esixiron distribuír soamente froita que fose producida en países da UE e avogaron por excluír os produtos procesados, posto que conteñen máis graxas e azucres. Tamén esixiron que a froita sexa “o máis fresca posible”.
Os parlamentarios tamén reclamaron que a distribución de froitas vaia acompañada de asesoría sobre saúde e dietética, así como de información adecuada á idade dos escolares sobre a agricultura ecolóxica e os beneficios do consumo de froita para a saúde. Ademais, mentres a Comisión suxire restrinxir a distribución deses produtos aos escolares de entre seis e dez anos, o Parlamento Europeo avoga por ampliala aos nenos en idade preescolar.
Por outra banda, os eurodeputados consideraron que o orzamento presentado polo Executivo comunitario (90 millóns de euros) non é suficiente. O pleno da Eurocámara pronunciouse a favor de financiar o programa con 500 millóns de euros. Eses 90 millóns “só permitirían dar unha peza de froita cada semana aos nenos de entre seis e dez anos”, mentres que “o ideal é que todos os escolares reciban unha froita ao”día , apuntou o parlamentario danés Niels Busk.
