Os pacientes con asma alérxica e rinitis posúen maiores probabilidades de sufrir unha alerxia alimentaria que o resto da poboación. Segundo un estudo realizado polo Hospital Clinic de Barcelona, que se presentou na XXII Reunión de Inverno da Sociedade Española de Pneumoloxía e Cirurxía Torácica (SEPAR), a razón atópase na interrelación das vías respiratorias coas dixestivas e prodúcese como consecuencia da acción de certas proteínas.
O estudo, dirixido por Joan Bartra, demostrou que esta relación está provocada pola acción dalgunhas proteínas, que provocan unha reacción alérxica ao introducirse por algunha das vías e a sensibilización do organismo. Posteriormente, a presenza de proteínas procedentes doutras fontes con composicións químicas moi parecidas á primeira ocasionan reaccións alérxicas como consecuencia dun proceso de sensibilidade cruzada.
O estudo mostra que en España máis do 50% dos pacientes con rinitis e asma por pole de plátano de sombra son alérxicos a algúns vexetais como o pexego, a leituga e a abelá. Nalgunhas zonas, onde a carga de pole de gramíneas é máis elevada, a maior parte das alerxias alimentarias nestes pacientes ocorren tras a inxesta de melón ou pexego.
Segundo Bartra, o patrón de alerxia aos alimentos está influenciado tanto polos aeroalérgenos presentes nunha determinada área xeográfica, como polos hábitos nutricionais dos seus habitantes. Por exemplo, o pole de bidueiro é o responsable do 20% das alerxias respiratorias no centro e o norte de Europa. Alí observouse que o 70% deses pacientes mostraban tamén alerxias alimentarias ás abelás, o apio e a cenoria.
A investigación demostrou que os vexetais son os alérgenos alimentarios máis frecuentes entre os afectados por este tipo de patoloxías respiratorias, xa que provocan reaccións a entre o 30% e o 60% destes pacientes. O segundo tipo de alimentos que máis reaccións provoca é o marisco, que é máis prevalente en pacientes con rinitis e nos que padecen asma alérxica por ácaros.
