O coco
Comparado con outras froitas, o coco posúe un contido moderado en auga (o resto de froitas contan cun 85 % de media), un contido lixeiramente máis elevado en proteínas e lixeiramente máis pobre en hidratos de carbono. Pero, sobre todo, na súa composición destaca a alta cantidade graxas que achega, cando o resto de froitas apenas as ten.
👉 Achegue nutricional
En detalle, o seu achegue nutricional cada 100 gramos é o seguinte:
- Enerxía: 353 Kcal.
- Auga: 45 g.
- Proteínas: 3,4 g.
- Graxa: 35,1 g.
- Graxa saturada: 29,3 g.
- Graxa monoinsaturada: 2,2 g.
- Graxa poliinsaturada: 1,6 g.
- Colesterol: 0 g.
- Hidratos de carbono: 5,9 g.
- Fibra: 9,5 g.
Aceite ou manteiga de coco
A graxa procedente desta froita preséntase, polo xeral, en forma de masa de cor branca ou marfil; a súa consistencia é pastosa ou fluída, segundo a temperatura ambiente.
Este alimento destaca, como todos os aceites ou graxas vexetais, polo seu elevado contido calórico (achega 899 Kcal cada 100 g de alimento) e en graxas (99,8 g en 100 g de alimento).
👉 Demasiadas graxas saturadas
Con todo, o perfil lipídico difire de maneira importante doutros aceites vexetais, como o aceite de oliva ou o aceite de girasol. Así pois, a manteiga de coco é sobre todo rica en graxa saturada. En 100 g de manteiga hai 87 g de graxa saturada, 5,8 g de graxa monoinsaturada e 1,8 g de graxa poliinsaturada.
Respecto ao tipo de ácidos graxos saturados presentes no aceite ou a manteiga de coco, a graxa de coco é unha das fontes alimentarias de ácidos graxos de cadea media (cadeas máis curtas de átomos de carbono), posto que é rico en ácido caprílico (8 átomos de carbono), capríco (10 átomos de carbono) e sobre todo en ácido láurico (12 átomos de carbono).
Tamén é fonte alimentaria dos ácidos mirístico (14 átomos de carbono) e palmítico (16 átomos de carbono), todos eles graxas saturadas.
Leite de coco
Debido a que a gastronomía asiática está de moda, cada vez utilízase con máis frecuencia o denominado “leite de coco” como ingrediente de múltiples preparacións. Esta bebida provén da ralladura do coco seco mesturada con auga.
👉 Achegue nutricional
O achegue nutricional por cada 100 ml deste líquido vexetal, ou ingrediente culinario, é o seguinte: 170 Kcal, 17,5 g de graxa (das cales 15,1 g son graxas saturadas) e 2,9 g de hidratos de carbono.
Así pois, trátase dunha bebida moi calórica e rica en graxa, sobre todo saturada.
Son estes alimentos recomendables desde o punto de vista nutricional?
O efecto que distintos tipos de graxas poden ter para a saúde das persoas é un tema que se estuda desde hai moito tempo. A graxa saturada (a formada por ácidos graxos de cadeas de átomos de carbono sen ningún dobre enlace entre eles) foi relacionada cun aumento dos niveis de colesterol e triglicéridos en sangue e un incremento do risco de sufrir enfermidades cardiovasculares.
✅ Manteiga e leite de coco: exceso de graxas saturadas?
Aínda que se investiga continuamente si distintos tipos de graxas saturadas poderían ter diferente efecto no organismo, até agora todo apunta a que a inxesta dos ácidos láurico, mirístico e palmítico eleva as concentracións de colesterol total, LDL (“colesterol malo”) e HDL (“colesterol bo”); mentres que o ácido esteárico (18 átomos de carbono) parece ser que podería ter un efecto hipercolesteromiante menor.
No entanto, a falta de maior análise que esclareza si algún tipo de graxa saturada é máis prexudicial que outra, de momento a prudencia indica que se debe seguir recomendando excluír da dieta os alimentos ricos en graxa saturada.
Desta maneira, dada a elevada incidencia de enfermidades cardiovasculares na sociedade, deberíase, polo menos como prevención, non abusar de alimentos ricos en graxa saturadas; entre os que se achan o aceite ou a manteiga de coco e o leite de coco.
✅ O leite e o aceite de coco de verdade adelgazan?
Con todo, o leite e o aceite de coco promociónanse hoxe en día en distintas páxinas web polo seu posible efecto na redución do peso corporal. Cabe pensar que un alimento tan calórico e aterogénico debe utilizarse para perder peso? A resposta, por lóxica, é non.
Estes produtos non só non axudan a perder peso senón que, en exceso, promoven unha acumulación de colesterol en sangue. Así que gozar excepcionalmente do seu sabor nalgunha receita non debe preocupar, posto que en dietética e saúde o malo non é o alimento, senón a súa frecuencia de consumo.
