España foi o primeiro país produtor de mel da UE en 2002

• Autor: Por mediatrader
• Data de publicación: Martes, 26deAgostode2003

España liderou a produción de mel na Unión Europea (UE) en 2002 con 36.497 toneladas, o que supuxo un incremento do 10,8% respecto da campaña de 2001, segundo datos da Coordinadora de Organizacións Agrarias e Gandeiras (COAG).

Por rexións, Andalucía encabezou a produción nacional con 7.200 toneladas, seguida pola Comunidade Valenciana, con 6.500, e por Estremadura e Castela e León, con máis de 5.000.

Na actualidade, España conta con máis de 2.397.000 colmeas, das que o 73,87% corresponden á apicultura profesional, e cuns 4.473 apicultores profesionais, co que a media de colmeas por agricultor sitúase en 396.

A variedade de mel que máis se produciu durante a pasada campaña no noso país foi o “mil flores”, que representa preto do 60% da produción nacional, seguida do “mel de breixo”.

En canto á comercialización, as vendas centráronse na industria almacenista, con 19.931 toneladas que representaron un 54,6% do total, mentres que 7.374 toneladas, é dicir, máis do 20% nacional, destináronse á venda directa ao consumidor, e o resto á comercialización en cooperativas e comerciantes polo miúdo.