Máis de 200 representantes dos campos da nutrición, a gastronomía e a ciencia participaron en Barcelona na oitava edición do Congreso Internacional da Dieta Mediterránea, que serviu para actualizar a denominada pirámide alimenticia. Este novo patrón, que substitúe ao de 2004, afirma que non fai falta abusar das patacas, que o sal debe reducirse á súa mínima expresión e que se debe comer moita verdura e froita variada.
Os especialistas coincidiron en que unha alimentación saudable debe conter moito aceite de oliva, cereais, produtos lácteos, froitas, hortalizas e verduras. Pola contra, hai que evitar a carne vermella, os doces, os embutidos e o sal. Pero estes consellos non serían completos, segundo sinalaron, se non estivesen acompañados de dous hábitos en principio sinxelos: hai que evitar comer só e é necesario facer exercicio diario.
O profesor Elliot Beriberi, especialista en metabolismo da Universidade Hebrea de Xerusalén, afirmou que a base da alimentación é aínda a auga, aínda que sexa auga corrente, as infusións, a froita e a verdura, que se xa eran importantes na antiga pirámide, agora por primeira vez sitúanse na base. Ademais, canto máis variadas e coloridas sexan as pezas de froita, mellor. Na parte fundamental da dieta sitúanse tamén o pan, o cuscús e os cereais con fibra, así como o aceite de oliva. Todos estes elementos da pirámide non só se deben comer todos os días, senón que debe facerse en cada unha das comidas principais da xornada.
O peixe tamén gaña puntos na nova pirámide da dieta mediterránea, igual que a froita seca, as herbas aromáticas ou as especias, que son aconsellables como substitutos do sal. Ademais é recomendable comer unha ou dúas veces por semana legumes, pito e ovos, se é posible sen xema para as persoas con problemas de colesterol. En tanto que a carne, sobre todo a vermella, e os embutidos convén non inxerilos máis dunha ou dúas veces por semana. Na mesma situación atópanse o chocolate e os refrescos de lata, que favorecen a obesidade.
