Unha alimentación composta por froitas e verduras variadas pode reducir o risco das persoas fumadoras a sufrir algúns tipos de cancro de pulmón. Unha investigación publicada en Cancer ‘Epidemiology, Biomarkers & Prevention’ concluíu que o consumo de diferentes variedades vexetais ten unha gran capacidade preventiva fronte a algúns tumores, sen que incida de modo especial a cantidade inxerida.
O estudo analizou os hábitos de consumo de 1.600 persoas diagnosticadas de cancro de pulmón en relación a 14 tipos de froita de consumo común e 26 variedades de verduras frescas. As conclusións demostran que o risco de desenvolvemento de células cancerosas descende de modo importante cando a alimentación consta dunha gran variedade de froitas e verduras.
Este é un dos primeiros traballos que avalía a diversidade antes que o consumo elevado e, segundo algúns expertos, podería fundamentarse nos compostos bioactivos da froita e a verdura. Stephen Hecht, da Universidade de Minnesota, apunta que dada a complexa mestura de axentes que contén o fume do tabaco, é lóxico que un maior número de axentes protectores poida contrarrestar de maneira máis eficaz os seus efectos nocivos. “No entanto, o público debería ser consciente de que a única forma probada de reducir os riscos de cancro de pulmón é evitar o tabaco en todas as súas formas”, lembrou Hecht.
